郭嘉諾人攰心不攰！
「我個人可能攰、隻眼攰，但係我個心唔覺得攰！」佳聯元朗主教練兼港隊助教郭嘉諾說道。身兼多職的「郭Sir」幾乎每天都要駕駛約120至150公里，訪問當日，他就由將軍澳前往元朗，再由元朗出發到何文田，繼而從何文田返回將軍澳，平均每天工作12至13小時，「郭Sir」仍樂此不疲：「我覺得好有意義嘅，雖然有時夜晚對眼睇嘢會好模糊，但個心係想做嘅，因為每做一樣嘢都係為香港足球好，好願意去做。」
每次看見「郭Sir」總是笑面迎人，散發着極強的正能量，並不是他擁有特異功能，而是他選擇把悲傷留給自己：「我都係一個普通人，我會睇網上留言，關心人哋對我嘅睇法。有時我聽到外面覺得我唔好嘅，我都會唔開心，但我要學識點去控制情緒。唔開心都唔可以表露出嚟，因為呢啲嘢只係關我事，自己嘅情緒唔可以影響到屋企人、工作夥伴同球員。」
無懼聲帶曾做手術照大嗌
相信球迷都記得元朗主場逼和傑志一役，該仗「郭Sir」末段不斷鼓勵球員上前，還鼓動球迷吶喊助威。其實他的聲帶曾動過手術：「我細個時嗌得太多、太大聲、中間冇抖氣，結果磨到出血，有粒息肉。嗰陣我有兩個禮拜唔講得嘢，嗰段日子係我成世人最痛苦。依家我都驚太大聲會再整損聲帶，但係如果唔大聲、唔在乎嘅話，球員唔會覺得我有投入。」
忙到女兒都唔認得感心痛
「犧牲」是「郭Sir」的足球理念，他要求麾下球員付出，但付出得最多的一個，或許是育有兩名女兒的他：「其實錯過咗好多陪女兒嘅黃金時間，啱啱作客對富力，我哋早咗一個禮拜去集訓，踢完波禮拜日朝早我見個細女，我抱佢，佢有少少唔認得我，有啲抗拒我。嗰刻個心好痛，好似覺得我唔係家人，甚至我有啲唔開心嘅係，平時一朝早大女去返學，我完成一日工作返到屋企，佢都瞓咗，一個禮拜好多日都係咁。有時只可以喺佢瞓緊覺時去摸下佢、睇下佢，感覺好似欠咗老婆同兩個女，希望之後多啲時間陪佢哋。」
「郭Sir」為港足搏盡，卻難為了至親，一路走來，他感激家人由反對變為支持：「多謝老婆、屋企人包容我，其實媽咪都好支持我，省港盃都有嚟睇，我岳父岳母亦成日留意我帶隊嘅消息。同好多球員一樣，屋企人一開始都係反對我做職業教練，自己都犧牲咗好多去成為職業教練，好好彩2018年成績算唔錯，令家人相信我揀嘅路係啱。」
圖／文：陳焌鏗