火併香港飛馬傑志誓打翻身仗
「中銀人壽香港超級聯賽」今晚於旺角大球場上演激戰，由傑志迎戰香港飛馬，主隊近兩仗未能勝出，急需一場勝仗振奮士氣；而香港飛馬則各項賽事取得3場不敗，並成為聯賽入球最多球隊。今仗兩雄相遇，定必有一番惡鬥！（on.cc東網周五晚8時直播）
上輪主場聯賽，被富力R&F打破跨季31場港超不敗紀錄的傑志，目前仍受傷患影響，除艾里奧仍未傷愈之外，另一中堅列斯奧亦上陣成疑。對於球隊上仗在菁英盃賽和冠忠南區一仗，主教練朱志光則稱讚隊中小將表現︰「上場羅梓駿同巴拉克等年輕球員表現幾好，雖然球隊受傷患問題影響，但佢哋都好落力，喺比賽期間都好有耐性。球隊好早就失波，但都仍然控制住個比賽，呢一點係好難得，再加上斧山道個場比較窄，佢哋都有耐性去堅持用波，值得一讚。」
對於今仗面對攻力強勁的香港飛馬，「朱Sir」提醒一眾傑志球員要避免不必要犯規︰「我哋會喺攻守方面上攞個平衡，唔會因為後防多傷兵而刻意保守，反而會喺死球方面會多加留意，因為受傷嘅球員正正係身材比較高大，所以今場比賽會盡量避重就輕，避免出現無謂犯規。」
火力盛搶攻藍鳥
作客的香港飛馬，上場菁英盃以4比2擊敗凱景，早前曾表明藉凱景一仗準備今場大戰，主教練陳浩然揚言要踢得進取：「對凱景之前，我哋一直備戰今場對傑志同下場對東方龍獅。上場對凱景見到球員做到我嘅要求，不過都有地方做得唔好，我哋今個禮拜都喺訓練入面做番好。依家我哋係聯賽最多入波嘅球隊，所以我希望用進攻贏傑志！」
連同早前對冠忠南區，香港飛馬已連續3仗未能保持清白之身，「陳Sir」指球員需要更集中：「我哋失嘅唔係世界波，好多都係自己唔夠集中，加上犯錯而失。之前畀球員睇片，佢哋知道自己喺邊啲地方做得唔好，我相信佢哋唔會重複犯錯。」
雖然對手數名防守球員受傷患困擾，但「陳Sir」仍不敢小覷：「傑志是強隊，兵源充足，後備球員上陣可能更有鬥心，所以我哋唔會特別有優勢。」香港飛馬目前未有傷兵，可「夫添」應戰。
文：陳焌鏗