陪約翰遜逛深水埗歎點心 陳芷澄新一年期待突破
陳芷澄2019再戰LPGA，睇好弗利特伍德拎冠軍！作為首位打入LPGA的香港高爾夫球手，陳芷澄(Tiffany)當然有留意今年的香港高球賽，上周五她更抽空出席賽事活動，與英格蘭球星約翰遜踩落深水埗，尋找美食之餘，亦大談自己2019年的計劃。
Tiffany陪同約翰遜在深水埗四處閒逛，連街市肉檔、海味乾貨檔都駐足細看，然後上茶樓品嘗叉燒包、燒賣、山竹牛肉、蝦餃幾味傳統點心，讓這位英格蘭球手感受一般香港市民的生活文化。
「出年一定係希望打得好過今年，始終今年成績出現較多起伏，唔係好滿意。但都好開心攞到2019年LPGA資格，所以我會喺開季前好好準備自己，希望下年成績會有突破。」由去年12月開始，Tiffany馬不停蹄參與多個比賽，直至兩星期前才開始放假，她搞笑透露：「冇掂Golf兩個星期，感覺開心又奇怪，依家我只想好好享受假期，12月會慢慢開始恢復練波。」
睇好弗利特伍德封王
今年香港高球賽繼續巨星雲集，Tiffany亦有緊貼戰況，她自己亦有冠軍心水：「心水其實有好多，包括列特同加西亞，但我覺得弗利特伍德係大熱門，希望可以親身去現場，睇吓大師級球手點樣發揮。」