熱血3子拍住上廣州

曾通明請教阿哥錦濤

司職防中的曾通明，是東方龍獅後衞曾錦濤的胞弟，自小已受胞兄薰陶接觸足球，最終更達成當足球員的夢想，今季轉投富力，哥哥「阿濤」亦有給予鼓勵，曾通明說︰「佢同我講，難得呢隊有咁多踢過港隊同有經驗嘅球員，可以同佢哋一齊練習，叫我裝備好自己，機會嚟嘅時候，可以好好表現自己。佢成日教我喺球場上點樣冷靜啲，點樣做每一個決定，教我點樣向有經驗嘅球員學習，畀到好多意見我。由於同阿哥踢嘅位置唔同，中場嘅嘢通常會向白鶴偷師，反而體能同跑動頻率方面就向阿哥學習，呢一點我好欣賞佢。」

對於菁英盃首仗便對東方龍獅，有機會與胞兄同場競技，「通明」坦言十分期待︰「其實想像咗呢個場面好耐，咁啱第一場就對東方，希望呢個畫面會發生。」

曾通明

麥富城

李卓翰難忘挑戰小紅魔

李卓翰去年曾在「賽馬會青少年足球精英匯」代表香港U17後備上陣對曼聯U16青年隊，他說︰「一世人冇乜呢啲機會，就算對方係青年軍都好。我哋踢落都見到自己有好多不足，人哋細過我哋一兩歲，但技術同基本功都好過我哋，爆發力強我哋好多。」

雖在爭奪菁英盃上陣機會時，3人當中或有人要先任後備，但李卓翰認為大家無分你我，會互相勉勵，一齊努力︰「依家大家一齊喺廣州住，日日都見，我哋冇理由有啲咩事唔一齊行動。球會有自己嘅訓練場地同健身室，練完波自己去做gym、去練射波、斬波都冇人理你，加上身邊有咁多有經驗同勤力嘅球員，自己都會受感染去加操。」

00後「富城」：我哋係幸福一群

去季為預備組神射手的麥富城，今季出任右中場位置，雖然跟隨一隊需要長駐廣州，有時周中又要南下應付預備組聯賽，但身為「00後」的他引用前輩盧均宜的話，認為自己是屬於幸福的一群︰「講真喺內地受訓辛苦好多，有時朝早做完體能訓練，要瞓陣覺晏晝先練到波，個強度高好多。始終年輕球員要捱吓嘅，『均宜』都有同我哋講，話每個球員都有捱過，其實我哋已經好幸福，以前佢哋細個真係可能會打（體罰），我哋依家最多都係有時攰啲，要搭車上上落落，都仲瞓到7、8個鐘，比起佢哋，我哋真係好幸福。」

談到菁英盃上陣機會，麥富城希望有機會落場︰「爸爸媽媽畀我唔讀書出嚟踢波，都要做番啲成績畀佢哋睇，用行動話畀佢哋知我做緊啲乜嘢，同埋我可以做到。」

圖/文：何彥霆