KD甩轆累勇士連敗
勇士昨晨喺NBA作客以109比112不敵獨行俠，爆出分裂鬧劇後連輸2場，內訌主角之一嘅積蒙格連唔知真傷定假傷，突然缺陣，杜蘭特就喺完場前關鍵時刻，連續兩次起手唔中錯過反超前機會，美國傳媒都覺得勇士「分裂後遺症」好大鑊！
除咗史堤芬居里同古辛斯繼續養傷，積蒙格連都話受到腳趾舊患影響，至少抖2場。不過有美國傳媒懷疑，勇士教練卡爾想平息內亂重整士氣，先至會安排積蒙格連休息，實際上佢根本唔需要避戰，分裂後遺症好大鑊，真相係點要由球迷判斷。
完場前2次起手都唔中
比賽方面，杜蘭特有32分、4個籃板同3次助攻，奇利湯臣有22分、3個籃板同4次助攻，不過KD喺完場前連續兩次起手唔入，跟住暫停完畢「湯神」嘅跳射又唔中，導致勇士2連敗，惟有希望「咖喱仔」講得冇錯，杜蘭特同積蒙格連冇隔夜仇會真正和好啦！