占士自我救贖湖人3連勝

雖然湖人喺第3節拉開過分數，但兩隊第4節又咬住上。最後階段「大帝」剷籃博到犯規，點知佢兩罰炒晒，好在古斯馬搶到籃板，就算佢跳射唔入，依然畀機會「大帝」補籃自我救贖，唔使做輸波罪人。最終占士取得26分、7個籃板同4次助攻，帶領湖人開季寫下7勝6負。相反鷹隊遭遇4連敗，後備上陣嘅林書豪落場14分鐘，取得6分、1個籃板同2次助攻，近日仲有傳聞佢有可能畀鷹隊放棄。

夏登翻生 火箭勝溜馬

同日火箭喺主場以115比103贏溜馬，占士夏登射入8個三分球狂轟40分、7個籃板同9次助攻，加上基斯保羅翻生有26分、5個籃板同5次助攻，協助火箭喺2連敗後反彈，不過安東尼連續2場缺陣，官方話佢病咗，但美國傳媒就話佢即將被踢走至真。