日本女足名將 自爆為錢露股
女足強國日本出現球員退役後，被迫「賣弄色情」維生嘅悲歌，協助日本奪得2011年女子世界盃冠軍嘅主力丸山桂里奈，自爆喺今夏俄羅斯世界盃舉行期間，上電視「露屁股」，其實係因為生活逼人，為咗賺錢維生，先至焗住犧牲色相。
退役後收入大減焗賣肉
現年35歲嘅丸山桂里奈曾經為日本女足上陣79次，射入14球，最威水係協助球隊2008年東亞盃及2011年世界盃冠軍。不過，丸山2016年掛靴之後，收入大減，每月只賺到8萬日圓（約5,500港元），加上做球員時期人工低，冇乜儲蓄，令生活愈來愈拮据，逼於無奈，惟有上娛樂節目自爆性史賺錢。而佢最大膽一次係今屆世界盃期間，喺電視節目中貼日本喺分組賽3戰全勝，否則就會露股畀觀眾睇，結果日本只有1勝1和1負，佢真係找數！
不過，丸山依家出來自爆，話當時並非真心睇好日本，故意扒冷令自己喺節目「露股」谷高收視，從而賺取報酬云云，認真催淚！但話分兩頭，今次係唔係丸山桂里奈又靠「賣古仔」賺錢，就不得而知。