球隊訂立咗明確嘅目標，要成功就一定要努力付出，過程可以肯定一啲都唔簡單，但喺過程中點樣去平衡各方面，難度先係最高！
一隊球隊要有成績，點樣令到每位球員都可以保持比賽狀態，就已經一啲都唔易，好似我哋球隊咁，今季加入咗好多新球員，對身為教練嘅我嚟講，當然係一件好事，人腳多咗唔止可以令比賽嘅調動充裕，喺練波嗰陣亦可以去做多啲嘢。但人一多，處理得唔好，自自然然會有問題出現，因為出場正選得11個、後備席上7個，總會有球員會因戰術需要、狀態或者部署等等，而冇得落場，甚至衫都唔使換。喺呢方面，身為教練諗法好單一，會以球隊係一個整體去諗，但點樣令到每一個球員都能夠以球隊「整體」去出發？呢樣亦係教練主要工作之一，而且一啲都唔容易處理。
所以，教練除咗球場內工作之外，球場外嘅工作同樣非常重要，點樣靠場外管理去推動球員，令每一個球員無論喺咩位置同時間，都保持正面同積極嘅心態，點樣令隊中無論係內地球員、香港球員、外援球員，乜嘢球員都好，可以做到上下一條心，無私為球隊作出貢獻，呢樣亦係我成日掛喺口邊嘅「團隊精神」。
富力R&F主教練 楊正光