林書豪倒戈救唔番鷹隊

林書豪離開籃網去到亞特蘭大，由於鷹隊得到被寄予厚望嘅新秀「新咖喱仔」泰爾楊格加盟，因此傷愈不久嘅林書豪今季暫時要做後備，結果呢位美籍華裔球星轉會後嘅首場正式比賽，只得13分鐘落場時間，但仍然交出6投3中得8分、5個籃板、1次助攻同1次搶截嘅高效率，仲試過克服傷患陰霾，強攻籃底博到罰球，可惜鷹隊於第2節被着晒火嘅紐約人攻入49分，最後當然冇辦法翻身。

至於泰爾楊格今仗上陣33分鐘，得到14分及5次助攻，表現或許「不似預期」，但以新秀首場NBA正式賽事而言仍叫合格。值得一提當然係老將卡達，呢位41歲「老飛人」轉會鷹隊後重返正選行列，今場為球隊貢獻12分，當中一記超遠程3分波命中最為精彩。贏波嘅紐約人於第2節攻入49分成為贏波關鍵，呢支東岸豪門雖然仍有主將普辛基斯缺陣，不過小夏達威手感火熱，獨取31分，睇到主場球迷High晒！

火箭輸波甜瓜冇料到

同日，上季常規賽冠軍火箭於主場以112比131不敵塘鵝，占士夏登有18分、9個籃板同10次助攻的「準3雙」數據，可惜新加盟的「甜瓜」安東尼後備上陣得9分同4個籃板，連累火箭「墜毀」。相反，傳出有意離隊嘅「一眉」安東尼戴維斯攻入32分、16個籃板同8次助攻，完全主宰賽事形勢，帶領塘鵝作客贏波。