富力R&F砌凱景3000萬+火力騷 佳聯元朗大無畏逼搶抗傑志
「中銀人壽香港超級聯賽」周日雙響炮！今日頭場「3000萬+」大軍富力R&F，作客深水埗運動場出戰凱景，賽事下午2時30分鳴笛；緊接尾場下午5時30分於元朗大球場，由「奇兵」佳聯元朗主場出擊，挑戰上季「3冠王」傑志。各位球迷除可入場支持愛隊，亦可透過on.cc東網直播欣賞兩場激戰！
頭場凱景迎戰富力R&F，主隊雖仍未「開齋」，但自一眾外援辦妥註冊後，上仗僅負理文表現大有改善，主教練馮凱文表示：「球隊默契上仍有不足，上場失波係自己犯錯，整體防守聯繫做得唔錯。今仗預料都相當困難，富力個人能力強，我哋會先加強防守，再伺機反擊，希望能『偷雞』搶分。」惟「馮Sir」對左閘位置感憂慮：「季前計劃係劉德仁擔任左閘，但佢早前練習時受傷，上場臨時拉伕搵黃耀富頂檔，長遠嚟講希望培訓到年輕球員。」
楊正光：防守要保持警覺性
富力上輪憑伊達「起孖」，主場4比2擊敗香港飛馬，取得今季首勝，射手利安高亦連續兩仗有士哥。惟主教練楊正光指防守仍需改善：「上場領先兩球下防守鬆懈咗，紀律性做得唔夠。」富力兩戰失掉5球，「楊Sir」警告球員要保持專注：「部分失波係喺對方明顯犯規在先而導致，球員必須保持警覺性，球證未吹罰，就要維持防守集中力。」球隊早前簽入身高1米91的克羅地亞中堅諾華高域，「楊Sir」稱或先列後備，此戰基本「夫添」應戰。
凱景雖以年輕球員為骨幹，但「楊Sir」直言不會輕視對手：「凱景加入幾位南韓球員後，表現好咗好多，佢哋上場其實有力搶分，所以今場唔會咁輕鬆！」（on.cc東網周日下午2時30分直播）
尾場佳聯元朗坐鎮主場強戰傑志，元朗上仗「地區打吡」不敵冠忠南區，未能延續不敗佳績，但主教練郭嘉諾滿意球員表現及心態︰「上場波雖然輸波，但係我哋冇怯場，亦毫無保留去攻去搶，今場波會搶得更犀利。我之前講過希望帶領一班年輕球員面對強隊，要佢哋唔好龜縮同覺得冇得踢，要有戰鬥嘅心態。傑志上季所有比賽淨係喺銀牌4強輸過畀元朗，今日嚟到呢度都會盡力搶分，所以我哋都要進取啲，會喺前場做多啲逼搶。」
郭嘉諾：傑志對我哋有顧忌
「郭Sir」透露今仗將有球員缺陣︰「陳嘉豪因借用條例唔出得，上年冇呢項條例，我覺得係好事，代表傑志有所顧忌。」
傑志上輪聯賽與東方龍獅激戰和波，及後小勝和富大埔衞冕社區盃。主教練朱志光透露傷兵盧卡斯、唐建文及費蘭度仍未完全康復，需在開賽前再作觀察，至於列斯奧及金奉珍兩位守將則有望復出，基於傷兵滿營，人腳調動空間不大︰「上場對大埔有好多傷兵，包括金奉珍同林恩許等，慶幸球員好團結同踢出好紀律，可以話表現出應有鬥志。」
「朱Sir」亦特別提醒球員要慎防佳聯元朗︰「元朗係一支唔差嘅球隊，始終佢哋喺主場會有一定優勢，加上我哋本身有唔少傷兵，選擇方面真係唔多，球員落到場就要更加小心應戰。」（on.cc東網周日下午5時30分直播）
文：何彥霆、陳焌鏗