劉家銘瓣瓣掂爭佳績

「家銘」、「學銘」兩兄弟對上一次並肩作戰，原來已經是兩人代表城巿大學出賽的年代，隨着今夏加盟南區，作為兄長的劉家銘表示能在港超舞台與弟弟合作感興奮︰「同細佬由細到大都好少同隊，踢職業更加冇做過隊友。因為以往唔同隊，大家好難一齊傾自己球隊嘅嘢，依家一齊可以研究吓戰術，點樣去配合。」

對細佬入選港隊感高興

雖然兩兄弟不時會被外界相提並論，但作為大哥的「家銘」就表明，只會為入選港隊的弟弟感到高興︰「喺球場外我哋係兄弟，喺球場內大家各自都係球員，佢有佢嘅發展，位置又唔同，唔會互相競爭，依家喺同一隊更加可以互相合作。就算細佬入選香港隊，無論係U23做隊長，定係有機會入選大港腳，我都好戥佢開心。」

要數到在港超聯賽能夠出任最多位置的球員，劉家銘必定是榜上有名，他亦認為自己對不同位置踢法的適應力，對球隊調動方面提供了多些選擇和變動︰「自己職業一開始都係踢防中，之後隨住元朗有唔同球員加盟，不時要轉位置踢。我覺得自己嘅足球概念都唔差，有時踢吓其他位都幫到球隊，我諗呢樣係我喺球圈競爭嘅本錢之一。」

感激元朗3位恩師提攜

在對上一輪聯賽協助南區擊敗舊東家的「家銘」，坦言在元朗度過的5年期間，兩度殺入盃賽得出不同結果同樣感到難忘，但他最感恩的，就是3位給予過他不少機會的恩師︰「我喺元朗時，3位教練都幫咗我好多，首先係『陳Sir』（陳浩然）帶我踢番職業足球，之後『馮Sir』（馮凱文），因為嗰時元朗轉咗好多球員，佢就畀咗好多出場機會我，中場、翼鋒、閘位都試過，令我有實戰經驗去進步。之後我同『達仔』（曾昭達）合作，佢就帶咗我踢翼衞呢個新嘅位置，我覺得自己上季喺翼衞嘅發揮都幾好，之後同大家攞咗個盃賽冠軍，所以都好感激佢哋。」

兄弟班拍住上，齊為冠忠南區力爭上游。

上輪聯賽劉家銘（左）為新東家倒戈元朗。

劉家銘Profile

出生日期：1993年12月31日

身高：1米80

體重：71公斤

位置：中場

曾效力球隊：深水埗、葵青、元朗

現效力球隊：冠忠南區

球衣號碼：23

圖/文：何彥霆