理文迎佳聯元朗爭響頭炮
尾場理文再於將軍澳運動場擺擂台，迎戰上仗有驚喜演出的佳聯元朗，兩軍均欲打開今季勝利之門，實力相若下必有一番惡鬥！（周六下午5時30分開賽）
揭幕戰以0比2不敵傑志的理文，隊中目前仍有域陀及黃駿軒尚未痊愈，今仗上陣成疑，但白智勳則有望復出披甲。主教練陳曉明坦言球隊仍受傷患問題困擾︰「有啲傷兵係上季留落嚟嘅，我哋仲處於調整階段，上場有啲球員更要『紮住』上陣，我哋仲喺克服緊呢個問題。」儘管「曉明Sir」稱讚元朗一眾新援表現不俗，但他強調較緊張己隊發揮︰「我哋仲摸索緊合適嘅打法，球隊始終較新，其實對傑志未算踢得好差，希望班球員踢得順番加強信心。」
郭Sir備戰防守「落重藥」
佳聯元朗上周趁休戰期間與東方龍獅友賽，以2比1擊敗對手，主教練郭嘉諾稱：「球隊最大問題係正選同後備差距太大，友賽志在畀年輕球員攞比賽經驗，等我調動上有更多選擇。」元朗上場4度領先下被大埔逼和，「郭Sir」刻意在防守『落重藥』：「呢兩周刻意練習防守，加強中前場壓逼，亦提高球員領先時嘅集中力。」理文助教曾昭達上兩季執教元朗，對此「郭Sir」強調沒有擔心：「今季嘅元朗同上季有好大分別，希望踢一場悅目賽事畀球迷！」