和富大埔香港飛馬駁火騷
「中銀人壽香港超級聯賽」今午上演兩場激戰，頭場和富大埔於主場大埔運動場惡鬥香港飛馬，兩軍首輪均攻入4球，展現澎湃火力，今仗一眾優質射手交鋒，隨時合演入球騷回報球迷。（周六下午2時30分開賽）
堅Sir：飛馬對到熟唔易應付
大埔與飛馬俱為上季三甲分子，大埔上仗與佳聯元朗激和4比4，主教練李志堅坦言球員集中力不足導致失分︰「我哋有啲死球情況可以處理得更謹慎，進攻上犯錯可能只係入唔到波，但防守上犯錯就會變成失球，所以呢方面要做得更好。」「堅Sir」續稱今仗對飛馬絕對「惡踢」︰「飛馬今季有個好開始，加上兩隊對戰咗咁多次，好清楚對手嘅風格，絕對唔係一個容易應付嘅對手。」
香港飛馬首輪於查維斯梅開二度下，4比1大破夢想FC。上季煞科一役完場前失守，令聯賽次席及亞協盃參賽資格拱手讓給大埔，主教練柏度坦言今日極想全取3分︰「大埔隊中有好多好球員，但我哋會盡力。上場波因為草地質素惡劣，所以改變咗踢法。最近一周我哋嘅備戰效果好滿意，其中仲有兩日畀球員放假，等佢哋取得平衡。」