富力R&F輸波贏掌聲 東方龍獅絕殺反勝！
「中銀人壽香港超級聯賽」昨假香港大球場上演首輪焦點大戰，最終半場落後1球的東方龍獅，憑着洛迪古斯及新援荷西安祖於完場前各入一球，以3比2反勝於比賽尾段僅得10人應戰的富力R&F。
今仗雙方分別由陳婉婷及楊正光擔任新帥，其中主隊東方龍獅更有前西甲兵荷西安祖及巴西籍日裔中場笠臣兩位新援正選上陣，並於開賽11分鐘便博得12碼；林嘉緯與伊達爭頂時被撞跌，惟艾華頓主射12碼欠缺力度及角度，皮球被富力門將陳梓榮一抱入懷。大難不死的富力戰至33分鐘有基奧雲尼右路妙傳利安高快射被擋出，憑之後的角球攻勢打破僵局，守衞梁諾恆接應伊達右路角球跳頂入網，為富力R&F領先1比0完上半場。
利安高入世界波
東方龍獅於換邊後僅2分鐘便扳平，艾華頓右路接應隊長梁振邦妙傳窄角度施射得手，然而客隊卻於56分鐘再度領先，利安高於左路禁區頂主射靚絕罰球死角入網。但富力戰至80分鐘，盧均宜爭頂時被指侵犯對手林嘉緯，累積兩黃一紅被逐，富力主教練楊正光亦因向球證投訴而被趕往觀眾席。踢多1人的東方龍獅先於90分鐘扳平；艾華頓於右路底線搶截皮球，第一時間橫傳後備上陣的洛迪古斯射成2比2。至94分鐘峰迴路轉一幕出現，鄭璟昊右路抽射被陳梓榮撲出不遠，荷西安祖補射入網，為東方龍獅射入反勝一球，以3比2擊敗富力R&F。
東方龍獅主教練陳婉婷賽後大方稱讚富力的表現，亦坦言己隊不能掉以輕心︰「我諗轉捩點係『均宜』張紅牌！富力踢咗場高質素嘅比賽，對我哋嚟講係好大嘅警惕。首先我哋入局唔係咁好，可能有少少季初病，對手喺體能同力量都相對優勝。希望今年喺中路做多啲地面組織，但目前未夠成熟，有啲地方再需要細膩啲，喺防守上我覺得兩隊都發揮得好好。」
牛丸評新援交到貨
對於隊中3位新援表現，「牛丸」亦給予正面評價︰「艾華頓上半場受射失12碼影響，嗰剎那係冇咗信心，慶幸喺半場同佢講完嘢調整番，亦發揮出功效，最後亦有助攻畀隊友。至於荷西安祖，大家都睇到佢用波能力好好，但首次踢大球場對4個後衞較辛苦，大家要時間去適應。笠臣喺畀波同由攻轉守嘅反應都做得好好，喺死球處理同控制比賽節奏上，都幫咗球隊好多。」