李慧詩爭先賽冧莊
今屆亞運場地單車賽事昨於雅加達國際單車館煞科，港隊再添2金1銀，「牛下女車神」李慧詩歷史性衞冕爭先賽金牌，男子麥迪遜組合梁峻榮和張敬樂更是趁對手爆胎，驚險首奪男子中長距離組金牌，一幕又一幕緊張又刺激的時刻，創下一頁又一頁新歷史，單車隊冧莊今屆取得3金4銀1銅佳績，今天將凱旋返港！
李慧詩（Sarah）周二在女子競輪賽歷史性首次成功衞冕亞運金牌，之後在爭先資格賽更以破亞運紀錄的10秒583晉級，霸氣盡現，淘汰賽再輕鬆擊敗日本太田梨友及南韓趙宣英。到決賽時刻迎戰老對手南韓的李慧貞，同樣以3盤2勝定勝負。
Sarah爆贏成條街
第一場對手李慧貞領騎，Sarah一直淡定跟隨其後，後段加速爆贏對手，成功領先1比0。第二場領騎的Sarah完全未受威脅，在最後一圈由頭爆到尾，贏對手「成條街」，成為香港體壇史上首位成功衞冕雙料冠軍的運動員！
Sarah坦言賽前定下了3個目標順利完成：「第一個係個人獎牌，第二係團體爭先賽入到14秒內，第三係團體合作，我覺得都達成到，最開心一定係同馬詠茹合作入到第2，因為呢個係大家互信嘅結果。」以2金1銀完成今屆亞運，看似圓滿，但Sarah卻搞笑表示：「最好有少少唔完滿，咁樣下屆先會想繼續努力。」
前後參與3屆亞運取得驕人成績，惟Sarah認為上屆與對手旗鼓相當才最難忘。順利完成亞運後，香港單車隊將要開始為2020東京奧運做準備，首要條件就是取得世界盃資格，作為大師姐，Sarah已經夠分出戰世界盃，所以這位「牛下女車神」可以放鬆心情抖一抖，為接下來的奧運周期作準備。