空手道「笑」女摘銅 劉慕裳：曾為風波爆喊
香港空手道總會於亞運前被港協暨奧委會無限期凍結會籍，令運動員士氣跌入谷底，不過昨日展開的亞運空手道賽事，港隊憑女將劉慕裳於女子個人形項目歷史性摘下銅牌，希望藉這面「風波後的獎牌」，為香港空手道界「沖喜」！
「個人形都掂，唔係對打先有牌」
「3月尾我曾經因為總會風波喺間房喊，諗前路會係點？當時又未選出亞運名單，覺得好多嘢都唔穩陣。」空手道總會風波牽連運動員的未來發展，加上港隊亞運前換教練，一度令劉慕裳（Grace）經歷職業生涯最艱辛的日子。「就算好多嘢影響你，只要專注喺一件事上，一樣做到成績。」5個月後，她於亞運女子個人形銅牌戰以5比0擊敗南韓選手，除個人初戰亞運即有牌落袋，更是香港空手道首面個人形獎牌，她希望借獎牌為香港空手道提供正能量：「呢塊牌唔只令自己開心，亦令香港個人形隊開心，唔係只得對打項目先攞到牌！好開心創造歷史，只係首日賽事，希望可以激發隊友士氣。」
「未諗下屆，先諗自己將來」
賽前提及今屆亞運可能是第一次，亦是最後一次，現時銅牌到手，會讓26歲的Grace肯定前途嗎？她貫徹萌爆風格笑說：「我頭先都有問自己呢個問題，不過仲未諗到，4年唔係好耐，或者睇下到時我嘅人生階段係點，咁我都要為自己未來計劃……哈哈！雖然十劃都未有一撇，但4年間可能閃電咁快就發生呢！」