凱景樂做新星跳板
港超聯新軍凱景昨日於深水埗運動場進行開操拜神儀式，主教練馮凱文透露球隊班費約為500至600萬元。新季會以培育年輕球員為旗號，甚至不介意變為球員「跳板」：「作為本土教練我都希望『土炮』有更多機會，喺學界接觸過好多有潛質新星，只係差個機會，希望有個平台幫到佢哋成長。」
作為港超聯「新丁」，凱景班費或不及其他球隊，但「馮Sir」揚言：「我哋主要對手只係自己，冇一隊係假想敵，每隊我都希望可以喺佢哋身上攞分！」陣中擁有多名年輕球員，「馮Sir」特別對兩位小將曾梓軒及孫銘謙寄予厚望：「我哋希望踢出嚟有活力，戰術上應以穩守突擊為主。而『積Sir』（曾偉忠）個仔曾梓軒、同孫銘謙呢兩位係我哋嘅重點球員，希望佢哋可以透過港超呢個平台，成長得更快。」助教黃耀富補充謂：「我哋真正想做到嘅係，培訓啲好嘅年輕球員，等佢哋畀其他球會睇中，之後可以離開我哋。始終香港愈嚟愈少人踢波，如果冇球會肯培育接班人，再咁落去一班有經驗嘅球員唔止第二春，第三春都嚟緊啦，我都驚我要踢到40歲！」
兩韓援跟隊試腳
早前曾傳出凱景或會退出港超聯，對此「馮Sir」趁機澄清：「之前一直有傳聞話我哋會退出，但球會從來冇咁嘅打算，只不過係冇出嚟澄清啫。組軍大致完成，華人球員基本上夠晒，除非出現特別情況，到時或者先增添人腳。」凱景現時有兩名南韓外援試腳，分別為24歲中堅金曙珍及32歲曾效力韓職勁旅全北汽車的中場徐相民，之後會再有外援陸續到港試腳，如合適便會留用。
