空手道鴛鴦牌運天注定
「4年來嘅經歷，幸好有你，任何事都一起面對！」空手道運動員曾綺婷面露幸福笑容，4年前她初次與男友鄭子文攜手出戰仁川亞運，同樣與銅牌擦身而過，昨日香港空手道團隊會見傳媒，這對情侶檔甜爆亮相，期望在互相扶持下，能夠於雅加達亞運攜手為港爭光！
李嘉維恨儲齊「大滿貫」
「大家早前都經歷低潮，最後可以回復水平，其實係『綺婷』嘅功勞，有佢陪伴身邊，絕對係我最大支持。」早前空手道總會出現風波，令鄭子文幾乎失去參賽資格，全賴伴侶「綺婷」令他堅持下去：「我哋會互相安慰大家，一人面對倒不如兩人面對，多個人分擔點都會舒服啲。」「綺婷」的鼓勵，令鄭子文臉上掛起甜笑。上月舉行的亞錦賽，二人就同奪銅牌，「綺婷」笑言兩人的命運，或許是天注定：「上屆亞運一齊失落銅牌，剛剛亞錦賽就同獲銅牌，希望只要我哋喺埋一齊，就可以衝擊獎牌！」
至於港隊大師兄李嘉維過去兩屆斬獲1銀1銅，今趟目標自然是儲齊「大滿貫」：「毫無保留！因為要放膽去想，先有機會奪金。現時教練團邀請咗強手嚟陪練，令我心中團火再次燃起，信心爆燈！」