班費1800萬和富大埔要爆

上季港超聯亞軍和富大埔昨假石門萬怡酒店舉行新球季發布會,會上宣布新季球員名單。為應付本地賽事和亞洲足協盃兩條戰線,球隊羅致了10名新兵,包括陳肇鈞、勞高、歐陽耀冲、澳門代表隊中場林毅東等,同時引入澳洲中鋒哈利(Harrison Sawyer)。主席蔡尚圻透露班費大約1,800萬港元,他揚言:「我哋今季要挑戰所有冠軍,亞協盃亦以4強為目標!」

自從和富大埔於2016至17球季重返港超聯起,蔡尚圻便一直支持球隊,來到今季,他認為是時候收成:「過去兩季,我哋目標係組織一支好嘅球隊,打好根基,今季我覺得係時候喇,我哋目標係要贏,無論咩比賽都一定要贏,做唔做到踢過先知,但我哋會向住呢個目標努力。經歷咗咁多年,呢班已經唔係年輕球員,佢哋係時候去望吓、摸吓冠軍,甚至係攞冠軍返嚟。」

澳洲高佬中鋒進攻支點

在陳俊樂、迪亞高、謝家強、袁振昇、積斯利、中村祐人等多名球員離隊後,大埔簽入10名新兵補充,主教練李志堅指新兵有助調配:「新球員需要時間磨合,不過我哋有個優勢,就係7成正選球員仍然在陣,戰術上唔需要做好多調節,只需要新兵去理解。」今季球隊邀得身高1米95、年僅21歲的澳洲中鋒哈利加盟,「堅Sir」期望他能成為球隊進攻支點:「上季我哋近似一個無鋒陣,因為我哋喺進攻欠缺支點,希望佢嚟到可以做到呢樣嘢。」

至於現為澳門足球代表隊中場的林毅東,繼深水埗後與「堅Sir」再合作。「堅Sir」表示要助他圓夢:「林毅東未試過全心全意踢職業足球,代表澳門後,燃點番對足球嗰團火,然後就搵番我,因為佢有穩定工作,我叫佢考慮清楚,佢最後都決定追夢。阿東本身住大埔,係一個好球員,所以畀機會佢。」球隊將於8月13日至24日到泰國曼谷進行集訓,將進行4至6場友賽,當中包括出戰泰超球隊曼谷聯和芭堤雅聯。

和富大埔新季職球員名單

主教練及總監:李志堅

助理教練:李恆匯、陳旭智、呂志興

訓練員:李敖男

管理主任:葉佳

門將

1 錢兆琛*、63 李瀚灝、99 曾文輝

後衞

3 艾華度、4 梁冠聰、5 杜度、6 翟廷峯、15 馮慶燁、27 張澤瑋

中場

7 黃威、8 李嘉耀、12 鄭子森*、13 楊賜麟*、16 陳肇鈞*、17 陳曉鋒、19 大衞拉菲爾、23 梁星耀、26 李家豪*、28 林毅東*、80 鍾偉強*、88 黃祖心、89 歐陽耀冲*

前鋒

11 勞高*、14 哈利*、18 伊高沙托尼、22 趙少維

有*者為新加盟球員

陳肇鈞:唔做陳俊樂2.0

和富大埔10名新兵中,陳肇鈞曾與主教練李志堅在深水埗、橫濱FC(香港)合作,新季再與「堅Sir」重逢,「肇鈞」認為時機成熟:「呢幾年我哋一直有聯絡、有接觸,只係等緊一個合適時機,希望今季可以發揮得好啲。」陳俊樂北上投廣州富力後,外界認為陳肇鈞將填補其位置,但他卻認為自己並不是「陳俊樂2.0」:「我從來都唔想填補任何人嘅位置,我同陳俊樂踢法唔同,會畀到球隊另一種感覺。」

陳肇鈞效力南華期間曾征戰亞協盃,和富大埔新季將會出戰這項賽事,隊內經驗較豐富的他揚言球隊有力一拚:「其實我覺得踢亞協盃唔係想像中咁難,香港球隊如果發揮得好,同其他國家嘅球隊唔係相差咁遠。」

至於新援哈利亦對球隊充滿信心,他透露今次來港緣於一位前隊友:「我效力紐卡素噴射機時,認識了之前效力東方龍獅的古高,我曾諮詢其意見,古高對我說香港是一個很好的地方,他很享受在這裏踢球的時間,所以我便決定來港。」

圖/文:陳焌鏗