葉鴻輝突破樽頸靠范俊業
今季由香港飛馬轉投東方龍獅的守門員教練范俊業昨日亦有現身，繼香港隊和南華後，再次與門將葉鴻輝合作，「范Sir」盼助「阿輝」再登高峰：「東方龍獅好早就搵咗我，經過詳細考慮後，我想接受一個新挑戰，希望幫『阿輝』再上巔峰，令佢技術再全面啲，跳出現時嘅框框。」
寄語愛徒學懂放下
在發布會上，主教練陳婉婷指「范Sir」能夠為球隊帶來新元素。「范Sir」的新元素，就是加強門將的腳下功夫，使他們變得更全面：「希望後防同龍門之間嘅配合再做好啲，現代足球亦要求龍門用波多啲，呢方面都會比以前加強訓練。」「范Sir」與「阿輝」曾經在南華及香港隊合作，他寄語愛徒能夠學懂放下：「佢其實好多地方都唔錯，但有時畀自己太大壓力，要放開一啲嘢去跳出框框。因為有時壓力會令龍門比較手緊，希望喺不斷練習下，佢可以得到提升。」
兩人合作已有8年，「阿輝」期望在「范Sir」協助下更上一層樓：「佢過嚟當然開心，最近一兩年覺得自己停滯不前，今季希望喺佢幫助下，可以再進步。」至於最渴望改善之處，他謂：「所有嘢！因為現代足球要求龍門要全面啲，佢嘅訓練包含唔同元素，過往我哋訓練比較少練腳法，今季佢會喺呢方面加多啲。」