東網2:30pm直播賽馬會青少年聯賽足總盃決戰

港會香港飛馬大激鬥

香港足球會對陣香港飛馬的15歲以下組別掀起決戰帷幕，兩隊都精銳盡出，務求要做到「獎盃落袋」！

聯賽王者有心有力

港會在4強時因對手退出比賽，不戰而勝，雖然休息時間因而增加，但教練Stewart Montgomery未敢放鬆，大讚老對手飛馬具威脅：「今次已經是我們本賽季第4次交手，飛馬是一支表現穩定的球隊，他們對己隊的踢法相信也瞭如指掌，這會是一場緊張的決賽！」港會人腳以國際學校的學生為主，當中部分隊員現時返回自己所屬的國家，所以Montgomery說可選擇的球員少了，但作為應屆U15聯賽王者，他相信每位球員的決心與狀態，並披露球隊將會大踢進攻足球，強攻飛馬防線！

在4強賽事，飛馬大數對手4比1晉級，決賽面對聯賽冠軍港會，飛馬教練辜榮業強調球隊不會怠慢，「辜Sir」期望球員在決賽能夠好好執行戰術：「4強我哋踢得唔錯，球員都可以做到賽前部署。而且幸運地，我哋係先入球嘅隊伍，所以踢得相對輕鬆，希望決賽時可以做到同樣嘅結果。」「辜Sir」又謂球隊積極備戰，望能改善不足之處，在決賽減少失誤，以報聯賽敗仗之仇。

放大圖片	青春！	放大圖片

「巨人殺手」碰頭傑志鍊自由人足球會

U16決賽戲碼由聯賽排第4的傑志對第7的自由人足球會，兩軍曾在聯賽3次交手，傑志取得2勝1負，在往績上佔優。球隊上仗擊敗聯賽冠軍香港飛馬，士氣大大提升，惟該仗反勝功臣Udebuluzor早前已向球隊請假，預料今仗不會披甲，在決賽失去一把尖刀，教練鄧兆聰承認：「影響一定有，但正如上場贏飛馬，我哋都係預咗輸嘅，但係最終都贏到。」

追夢！	放大圖片	陳俊樂（黃衫）

然而，兵源緊張亦令「鄧Sir」相當煩惱：「由於部分人需要應付考試，以致我哋兵源不足，導致球員有時都要踢唔擅長嘅位置，但慶幸佢哋都願意為球隊犧牲。雖然我哋喺聯賽排名高過自由人，但係對手有幾位球員速度好快，都唔可以睇小。」

溫Sir：最緊要心態強

對手自由人足球會上場憑互射12碼擊敗勁旅南華，在聯賽首循環亦曾以1比0贏傑志，不過教練溫遠雄認為：「決賽冇弱旅，你一定要心態強，其實之前喺聯賽三循環入面，我哋成績雖然唔算好，但係踢出嚟嘅表現絕對唔失禮。我希望隊員有信心去應付，因為差距並唔係想像中咁大。」

「溫Sir」續說：「呢班球員好乖、練得好足，上場擊敗南華對佢哋嚟講係一個好大嘅獎勵，亦都畀到信心佢哋，希望隊員可以喺決賽舞台證明自己。」事實該隊右翼譚佑彰突破能力強，左腳推大位遠射更屬其拿手好戲，預料自由人在進攻方面亦會較倚重他。

傑志門神黃梓豪迎南區挑機

今屆U18冠軍戰，由傑志惡鬥上場如英格蘭般破12碼魔咒的南區，傑志門將黃梓豪雖滿18歲，卻是首度踏上青少年足總盃決賽舞台。皆因3年前的U15決賽，他在陣前受傷無緣披甲。誰知一等便是3年，種種經歷讓他成長，只待今次機會證明自己，用冠軍去修補遺憾。

養傷留憾學會專心

「個波好近射過嚟，自己奀、唔夠力，右手手腕就斷咗。」3年前醫生告知無法參賽的畫面，黃梓豪仍歷歷在目，當時他年紀尚小，無法接受現實而流下男兒淚，最終隊友雖為他拿下錦標，卻仍讓他留有遺憾：「一路睇波會想參與其中，前兩屆錯過咗好可惜，今次如果攞到冠軍，呢個青年隊生涯就圓滿。」受傷令黃梓豪擔心拖慢進步，康復後更勤力、上心，今季他更隨一隊訓練，體會更深：「最緊要係專心，要進步都要集中，落到場就要全心全意去搏。」

南區破12碼魔咒

南區去仗憑互射12碼淘汰愉園晉級，黃梓豪指自己在這方面有優勢，最想用穩健表現證明自己：「等咗呢次機會好耐，過往我畀人印象係撲12碼好啲，但今次想喺場上判斷等領域，都令人覺得穩定同放心。」除黃梓豪外，傑志陣中亦有袁振稀、周衍丞、俞永康及陳嘉成等於一隊跟操，教練陳家麒認為他們有能力衝冠，不過與新血磨合需時，希望球員互相帶動向前。

至於南區球員在過去幾年的各項賽事，已多次因互射12碼落敗而錯失決賽席位，教練呂文輝指球員上場有如今屆世界盃的英格蘭一樣，成功克服「12碼恐懼症」，讓全隊士氣有所提升，誓要為地區球隊爭一口氣：「球圈大多數人認為地區球隊嘅資源、名氣同球員質素都不及球會，但我哋喺努力同堅持下，呢幾年成績唔錯，係一支能夠創造奇迹嘅球隊。今場正好係地區同球會嘅一次比試，全軍上下都充滿信心奪標而回！」

青少年聯賽港超球星搖籃

作為本地足球壇最重要的青少年賽事，青少年聯賽一直都被視為「球星搖籃」，近年亮相的「小球員」更已陸續登陸港超聯，為港足接軌！當中曾為橫濱FC（香港）同時於頂級聯賽及U18上陣的陳俊樂，於2014年就為球會贏得U18足總盃冠軍，成為其登上本港球星之路的「踏腳石」。除了陳俊樂之外，林樂勤、胡晉銘、袁皓俊等不少現役港超聯球員，都曾在青少年聯賽足總盃初露鋒芒！