東方龍獅簽林嘉緯艾華頓
矢志新一季重返爭標行列的港超聯球隊東方龍獅，昨午透過球隊Facebook專頁公布新一季球員名單，最矚目新兵包括上季效力陽光元朗的「足球明星最佳11人」前鋒艾華頓，以及將以超齡球員身份出戰亞運會的中場林嘉緯，另回收多名上季外借期間表現出色的謝朗軒、陳肇鈞和姚浩明等年青球員。至於球隊季前集訓、熱身賽和新外援之外排，將於日內公布。
對於這份新季球員名單，總監梁守志表示有3方面，希望可以為球隊帶來正面作用，他表示：「首先當然是『嘉緯』，港超之中有很多出色嘅中場，而佢肯定係其中一位，以『嘉緯』嘅經驗同實力，唔止可以提升到球隊實力，亦可以幫到隊中年青球員成長，佢係球隊新一季最重要嘅羅致。」林嘉緯新一季將披起東方龍獅20號球衣。
回收謝朗軒等年輕球員
「而艾華頓嘅個人突破能力同速度，應該冇咩人會懷疑，上季我哋喺『高級組銀牌』輸畀陽光元朗，佢真係好厲害，條片我睇咗無數次，肯定冇入錯貨。」梁守志謂。「至於回收謝朗軒等多名年輕球員，其中一個目的就係等球隊年輕番啲，當然佢哋要努力向隊中嘅經驗球員學習，畀心機咁先可以有進步。」
梁守志盼各將充分合作
問及新季目標時，「梁總監」一改過往作風表示：「我講話想捧幾多個盃冇用，最緊要係球隊嘅新兵同舊將可以充分合作，職、球員一切為球隊榮譽去努力，唔好再辜負會方嘅支持就得喇。」另有關球隊新外援，以及季前集訓之目的地，他則謂會方日內會發布有關消息，希望球迷可以鼎力支持東方龍獅。
嘉緯：轉會主因渴望比賽
剛和太太到曼谷旅行，慶祝結婚1周年的林嘉緯，對於新球季的種種挑戰表示期待，揚言會做好本分，不會令支持他的球迷失望。
這位中場表示：「之前都講過要離開效力11年嘅傑志，係一個好難好難嘅決定，我知有好多人會話我轉會咪又係為咗錢，無錯！條件係一個考慮，但最大原因係我真係好渴望比賽，我堅信我自己嘅能力，仲可以貢獻到畀球隊。雖然已經離開咗，但呢11年嚟好多人同事都喺我心中，多謝晒！」
超齡身份征戰亞運
新季將變成「林20」的「嘉緯」提到，目前目標除要在東方龍獅爭取到正選之外，還有首次以「超齡球員」去征戰印尼亞運：「未試過，希望可以幫到班後生仔，幫到香港隊。」
林嘉緯Profile
出生日期：1985年6月5日
身高：1米72 司職：中場
曾效力球會：流浪、花花、傑志
現效力球會：東方龍獅球衣號碼：20
家庭狀況：已婚，太太：Sa姐；兩隻愛犬：芝治、蝦頭