平治雙雄上岸麥斯仔開齋
平治雙雄失威！昨晚F1奧地利站，原本排頭位起步嘅平治保迪斯，壞波箱提早上岸，點知其隊友「黑帝」咸美頓亦因機件問題「爆唔起」，同樣未能完成賽事，益咗紅牛嘅麥斯韋斯塔本「冷手執個熱煎堆」，今季首次踏上頒獎台最高位置！
今仗「黑帝」原本有個好開始，一起步即爬過隊友保迪斯殺上第1位，點知保迪斯喺第15圈壞車，咸美頓嘅戰車喺第29圈入維修站後開始出現問題，去到第64圈更宣布「畢業」。反觀紅牛車手麥斯韋斯塔本，今仗發揮穩定，成功領先到終點，取得個人今季首冠，至於法拉利嘅拉哥倫及維度爾則分列第2及第3。維度爾仲喺車手榜以1分之差壓過咸美頓升上榜首。
