施瓦茲曼入場撐阿根廷

去到訓練場探班，施瓦茲曼（右）梗係要捉住美斯合照啦！（互聯網圖片）

25歲的施瓦茲曼於今年法網強闖8強，成功在「泥地王」拿度贏得一盤，終止拿度法網41盤連勝紀錄，打出生涯代表作。這位阿根廷球手原來是足球迷，更可能是網球界最瘋狂的一位，他特意飛到俄羅斯搵美斯「集郵」，直闖訓練場地同國腳們攬頭攬頸合照，以及觀看阿根廷對克羅地亞一戰。施瓦茲曼早前接受ATP訪問時提到：「阿根廷人同足球係分唔開，原本我有諗過成為足球員，但最終都係揀咗網球，事實證明呢個決定係正確，因為我踢波唔係好叻。」

同馬納當拿最Friend底

施瓦茲曼和阿根廷球王馬納當拿都叫「Diego」，兩人更相當「Friend底」：「馬納當拿係阿根廷所有運動員嘅重要資產，佢份人好『真』，有任何觀點就會照直講，同佢傾偈絕對獲益良多，況且呢位一代球王好風趣，之前成日同我講，『喂，細Diego仲唔快啲叫大佬。』到之後美網我入咗8強，佢就讚我同佢一樣都係『大Diego』 ！」溫布頓網球公開賽將於7月2日舉行，世界排名第11位的施瓦茲曼被列為15號種子，雖然他近日「專心」睇世盃，練波量少不免削減，但只要愛隊阿根廷踢好波最終捧走世盃，施瓦茲曼認為同自己爭標同樣重要！

派膠門將韋利卡巴尼路（左）同保羅戴巴拿（中）都唔放過。（互聯網圖片）

施瓦茲曼（左）入場睇阿根廷對塞爾維亞。（互聯網圖片）