咖喱仔最遠三分球為勇士贈興 豬隊友累大帝輸波
勇士喺NBA季後賽總決賽Game1主場以124比114加時擊敗騎士，場數領先1比0。史堤芬居里攻入29分，包括喺完半場前射入超遠程壓哨三分波，創出個人總決賽最遠三分球紀錄，同時亦係近20年總決賽中，距離最遠嘅三分表演。
史堤芬居里有29分、6個籃板同9次助攻，杜蘭特攻入26分、9個籃板同6次助攻，奇利湯臣亦貢獻24分，同時爆發為勇士帶來勝利。根據ESPN估計，史堤芬居里完半場前射入嘅壓哨三分球，距離達到11.6米，屬於「咖喱仔」4次參加總決賽以來，個人最遠命中紀錄，而且佢喺第4節結束前，曾經剷籃完成「And 1」好戲，加時又能夠單對單守住勒邦占士，難怪外界將史堤芬居里捧成總決賽MVP大熱。
占士轟51分平波神紀綠
今仗另一紀錄則由「大帝」勒邦占士刷新，但「首個於總決賽得分50＋而輸波」的名銜實在不要也罷；勒邦占士今仗狂轟51分、8個籃板同8次助攻，創出個人總決賽得分新高，同時季後賽累積109次得分「30＋」，追平「波神」米高佐敦並列歷史第1位，可惜隊友JR史密夫喺第4節結束前搶到籃板，竟然豬到唔嗌暫停又唔交波，導致騎士錯過絕殺機會，戰至加時仲要輸埋，激到「大帝」紮紮跳。