浪花兄弟醒番勇士追平火箭
勇士喺NBA季後賽西岸決賽Game6主場以115比86擊敗火箭，最多落後17分下完成逆轉，場數追成3比3，將會喺明早9時上演嘅Game7作客火箭決生死，加上騎士喺東岸決賽同塞爾特人場數同樣打成3比3，成為39年來，首次出現分岸決賽同時打Game7嘅難得場面。
前幾場手感普通嘅「浪花兄弟」史堤芬居里同奇利湯臣，今仗表現爆發，喺第3節爆Seed，輪流表演招牌三分波上演大逆轉，最後史堤芬居里取得29分，三分14投5中，奇利湯臣有35分，三分14投9中，協助勇士避過出局危機，火箭王牌占士夏登獨取32分都冇用。
39年來首次！分岸決賽齊打G7
今次係1979年後，NBA首次出現分岸決賽同時打Game7嘅情況，當年馬刺仲喺東岸遇上子彈，太陽就喺西岸同超音速爭晉級，結果子彈喺總決賽以1比4不敵超音速。