豬一般隊友拖累 騎士又輸大帝灰晒
騎士喺NBA季後賽東岸決賽Game5作客以83比96不敵塞爾特人，場數落後2比3，雖然勒邦占士攻入26分，可惜佢嘅隊友唔生性，導致騎士陷入出局邊緣。另一邊廂，勇士喺西岸決賽更大鑊，因為射手奇利湯臣同伊古達拿可能因傷錯過Game5嘅大戰。
第1節騎士已經落後13分捱打，即使「大帝」勒邦占士今場交出26分、10個籃板及5次助攻都冇符，因為原本最可靠嘅隊友路夫只得14分、7個籃板，佢喺首節如狼似虎攻入10分之後，餘下3節幾乎失蹤一樣僅取4分，而其餘3個騎士正選包括JR史密夫、佐治希爾同卓斯坦湯臣更加失敗，起手次數唔少，但夾埋只為騎士攻入10分。
回師主場信心返晒嚟嘅塞爾特人，內線支柱荷福特錄得15分、12個籃板同1次助攻之外，謝倫布朗亦為「綠軍」貢獻17分，協助塞爾特人完成贏波任務。不過數到贏波功臣，首推達頓表現最出色，今仗獨取24分、7個籃板及4次助攻強勁數據，順便慶祝自己剛入選聯盟最佳新秀一隊，同時季後賽累積攻入309分，相比名宿張伯倫及「魔術手」莊遜嘅新秀球季得分更高。
奇利湯臣缺陣勇士頭痕
正當騎士喺東岸陷於出局危機，勇士喺西岸同樣好頭痛，繼伊古達拿缺席Game4，導致勇士防守力下降被火箭追平場數2比2後，奇利湯臣於Game4被對手踩中，引致足踝及左膝受傷一度離場接受治療，目前甚至盛傳將會缺席Game5，隨時成為勇士出局嘅伏線。
事實上，現時勇士嘅士氣好差，據講杜蘭特於Game4輸波後，意識到危機即時「黑晒面」，教練卡爾更加承認，於Game4最後一節失守斷送好局，令佢嬲到成晚瞓唔着，加上NBA官方賽後報告顯示，其實史堤芬居里同奇利湯臣喺Game4加埋有3次走步違例冇吹，有球證關照都贏唔到，卡爾唔擔心至奇啦！