ＮＢＡ季後賽東西岸決賽，香港時間周一凌晨展開，東岸決賽騎士鬥塞爾特人，西岸則是火箭與勇士之爭。
塞爾特人對騎士之戰，即使「綠軍」常規賽排名比騎士高，依然被外界睇淡；不過美國傳媒大爆，其實塞爾特人教練巴特史堤芬斯，已經搵埋正值養傷的艾榮開會，研究點樣砌低由「大帝」勒邦占士領軍的騎士，所以並非一定輸硬！
東岸決賽Game1於周一凌晨3時30分開賽，塞爾特人主場迎敵，前季艾榮同勒邦占士合作為騎士奪得總冠軍，但上年夏天艾榮轉會，傳出同「大帝」反面，所以即使缺陣都好想協助綠軍打爆騎士，開會時盡爆勒邦占士所有打法上缺點。另外，據講艾榮對如何防守路夫、高華同ＪＲ史密夫，一樣提供好多內幕意見！
至於西岸決賽火箭對勇士則於周二早上9時打第一仗，火箭主將夏登賽前表示自己在季後賽失誤太多，特別在過去兩場比賽，並提及勇士的攻守打法及轉換能力屬聯盟最強，故一定要減少失誤，再全力與對手周旋。