東網5:30pm直播足總盃兩虎鬥 傑志香港飛馬為決賽不退讓！
足總盃今午旺角大球場續演4強大戰，力爭衞冕的傑志火併香港飛馬。目前向「3冠王」邁進的傑志有科蘭傷愈復出，但仍受傷兵潮困擾；上仗聯賽一度落後兩球下逼和陽光元朗的香港飛馬，球員信心大增，盼能一雪早前在聯賽僅敗之恥，向錦標進發！（on.cc東網周日下午5時30分直播）
科蘭傷愈復出攻堅
贏得聯賽錦標的傑志，在菁英盃亦殺入決賽，連同足總盃叫胡「3料冠軍」，主教練朱志光表示，艾里奧、列斯奧及盧卡斯仍在養傷，加上季中回收的佐迪及鄭展龍未合上陣資格，人腳方面較短缺︰「依家到咗季尾，要保持爭勝心態好重要，本來都有啲擔心球員贏得聯賽後會放鬆，佢哋能否喺呢3、4場波保持集中好關鍵。好在我感覺唔到佢哋有鬆懈到，反而兵源呢個影響比較大。」早前因傷缺陣的科蘭已告康復，近日操練後亦有自行加課，今仗有望上陣。
楊正光喜見信心提升
香港飛馬上周聯賽打出拚勁搶回寶貴1分，在爭奪聯賽次席上保住主導權，主教練楊正光坦言球員信心提升：「上場喺對抗方面較輸蝕，希望球隊喺呢方面提升番，尤其嚟緊對傑志同大埔都係硬仗，其實喺下半場見到球員嘅鬥心出番嚟，證明我哋可以做到。始終輸贏係取決於球員心理質素，技術同體能我哋可以幫到，但心理範疇必須要球員自己去調節。」
「光Sir」特別提及上月中聯賽對傑志僅以1球見負，球隊表現其實不俗︰「對傑志場波大家都踢得唔錯，兩隊控球率百分比、傳球成功次數等都好近，證明我哋有能力，希望今場可延續呢份信心。」
文：何彥霆