6歲詹晞雯熱血有夢想

姊弟兵拍住上

Penguins隊中女將、現年6歲就讀協恩小學的詹晞雯（Hailey），與5歲的弟弟詹晞堯「拍住上」，一齊學習冰球。據「詹媽媽」透露，詹晞雯大約在3、4歲已開始學習冰球，原來學冰球只為個「型」字：「冰球速度快，同埋型！本身我個女比較男仔頭，佢之前學過花式溜冰，到3、4歲左右，覺得一個人玩好悶，所以就畀佢學冰球。」對「詹媽媽」而言，冰球不單止「型」，還可以鍛煉小朋友心智：「我覺得小朋友玩運動可以幫到佢哋鍛煉毅力，唔會遇到少少挫折就放棄，生活上遇到咩困難都可以好快克服，個人都冇咁悲觀。」

在香港當運動員，往往需要兼顧學業，以致時常分身不暇。在Hailey的冰球路上，原來「詹媽媽」也想過放棄：「銜接小學嗰陣，試過唔畀佢玩，因為如果想喺運動方面表現出色，係需要付出較多時間。開學嗰陣想同時兼顧學業同運動，令大家都好辛苦，所以當時想過放棄。」

豈料「詹媽媽」被Hailey一次比賽感動了，決定要堅持下去：「有次打到最後一場，咁啱佢病咗，我同佢講『不如唔好打喇，妳抖下喇，妳第二日仲要默書考試。』佢當場坐喺度喊，然後同我講『媽咪呀，最後一場喇，妳畀我打埋佢啦。』」

今續演青少年組賽事

她續說：「我冇諗過一個6歲嘅小朋友有咁嘅反應，對運動咁有熱誠、咁執着。連小朋友都唔放棄，咁點解父母要放棄呢？如果我幫到佢，我都好想幫佢，我自己都做過小朋友，我都有夢想！」

「2018 Mega Ice五人冰球賽」今上演青少年組第二日賽事，開幕禮將於中午12時05分舉行。此外，來自泰國的球隊AIYARA將再度登場，賽事不設門票，歡迎球迷到場觀戰！

2018 Mega Ice 五人冰球賽on.cc東網直播安排

4月28日

晚上9時 青少年組「PEE WEE A」決賽

晚上10時 青少年組「BANTAM A」決賽

5月5日

晚上7時 成年組「國際Ａ」決賽

晚上8時 成年組「亞洲Elite」決賽

晚上9時 成年組「國際Elite」決賽

圖／文：陳焌鏗