范俊業培訓升級版豬仔
意大利鋼門保方40歲仍征戰歐洲最高水平舞台，證明守門員的職業生涯不太受年齡所限，不過2003年曾後備入替「零封」皇馬「6條A」的前港隊門神范俊業，卻選擇忘記昔日輝煌，退居幕後，現任香港飛馬守門員教練的「豬仔」自言化身「黑面神」，決心訓練出比自己更強的本土門將。
「守門員孤獨又辛苦，獨立但又有團隊性，龍門唔可以犯錯，因為可能會導致輸波。」球場上把守最後一關超過20年，范俊業自然明白這一角色的艱辛，他指現今門將與當年要求變化甚大：「依家講求全能同完美，多咗好多回傳球，斬波要準繩，唔係大腳清就得，要幫球隊保持控球權，用短用長波都可以，所以腳下功夫、意識都要不斷進步。」
黑面Order「100%畀晒我」
每樣亦要兼顧，究竟應該從何做起呢？范Sir透露每課操練以基本功為主：「Set得太多嘢，未夠能力就做唔到效果，要知道球員嘅能力同缺點先可以提升。最緊要每個出嚟都有信心，龍門每次只得一個出場，但未踢都要準備，1分鐘都係表演時間，你要令人信任先至有機會出場。」
軟硬兼施，或是范Sir的格言：「我有時都做『黑面神』，會幾固執，守門員要集中，訓練時我會要求佢哋100%畀晒我，咁先會有進步。比賽就係邊個熟練就邊個贏，我會喺網上睇片參考，根據球員能力改變，每日設計唔同方式畀球員練習，等佢哋保持興趣同鬥心。」
高峰時期為香港隊首席門將，國際賽上表現揚威海外，亦以門將身份當選香港足球先生，2003年於表演賽後備入替迎戰西甲班霸皇家馬德里更屢救險球，在施丹、朗拿度及魯爾等世界級球星狂攻下半場仍力保不失，一夜成名。不過范俊業就如訪問當日穿着的黑衫黑褲黑帽一樣，低調又沉實：「只覺得自己好榮幸，嗰場其實打得OK啦。依家好少講自己以前點樣，過咗去就過咗去，只會向球員分享實戰經驗，做好自己本分，希望球員逐批接班。」
轉做教練唔阻人接班
去年「香港賽馬會社區盃」范俊業客串出任「桂神邀請隊」門將，無論身手及反應都不失當年風采，或有球迷慨嘆他太早退役，他卻解釋：「當時我覺得唔能夠提升自己，香港亦未有足夠及正式嘅守門員教練，自己有機會教出比我更好嘅門將，橫掂未來都想做呢樣嘢，不如早啲轉變去準備。其實頭幾年都有球隊搵我，但我係要訓練更多球員上嚟，如果我繼續踢就會阻礙佢哋接班，所以我一一拒絕。」飛馬門將袁皓俊及梁興傑今季表現有目共睹，范俊業背後的努力相信亦功不可沒。
范俊業 Profile
別名：豬仔
出生日期：1976年5月1日
曾效力球隊：快譯通、愉園、南華
曾執教球隊：南華（守門員教練）、愉園（助理教練及守門員教練）
現執教球隊：香港飛馬（守門員教練）、香港代表隊（守門員教練）
本周賽程
4月21日（六）
菁英盃4強
和富大埔 Vs 香港飛馬
旺角大球場
下午5時30分
$80、$30（特惠票）
4月22日（日）
中銀人壽香港超級聯賽
標準流浪 Vs R&F富力
深水埗運動場
下午2時30分
$80、$30（特惠票）
菁英盃4強
傑志 Vs 夢想ＦＣ
旺角大球場
下午5時30分
$80、$30（特惠票）
圖/文：袁志浩