大帝「暴走」騎士威番鋪
東岸首圈Game1倒灶嘅騎士，尋日Game2再鬥溜馬顯然唔敢怠慢，其中「大帝」勒邦占士喺第1節已攻入20分，加埋完場前連入4個關鍵罰球，助球隊主場以100比97險勝溜馬，追平場數1比1。今仗開「暴走mode」嘅占士攞到46分、12個籃板同5次助攻，喺佢近10年第10次喺季後賽交出「40+10+5+」數據，可見占士即使年屆33歲，喺球場上嘅「統治力」絲毫未減！
另一方面，溜馬主力奧拉迪普開波1分鐘就被連吹兩次犯規，結果受到犯規問題困擾，只得22分、3個籃板同6次助攻，幫唔到溜馬贏波。
普帥愛妻離世占士哽咽
今場賽事尚有小插曲，勒邦占士賽後受訪時，被記者告知馬刺主帥普波域治愛妻，於當地時間周三離世嘅消息，「大帝」當場哽咽，強忍淚水回應︰「我一直都係普波域治嘅fans，呢件事係一場悲劇，令人好沉重。我喺度向普帥同聖安東尼奧嘅所有人送上祝福，希望大家都能平平安安。」