火箭屠狼周琦都有份

火箭喺NBA季後賽西岸首圈Game2主場以102比82再贏木狼,總成績領先至2比0,今仗雖然占士夏登僅得12分,但基斯保羅攻入27分完全復活,加上周琦喺完場前獲派上陣,成為事隔2,176日後,首個喺NBA季後賽出現嘅中國球員,值得熱烈慶賀!

今場火箭初段手風奇差,開波頭6分鐘都係得單位數得分,令第1節以18比23落後,不過喺第2節火箭終於「回魂」瘋狂搶分,結果基斯保羅有27分、3個籃板同8次助攻,即使占士夏登全場18投得2中,只得12分、4個籃板同7次助攻,依然足夠火箭贏102比82,場數領先2比0。相反,唐斯繼續失準得5分同10個籃板,下半場更加被雪藏得4分鐘上陣時間,難怪木狼再敗一仗。

另一個焦點係,周琦喺完場前2分45秒獲派上陣,取得2分同1個籃板,佢唔止喺三分線外帶波殺入顏色地帶跳射得手,仲成為2012年5月4日易建聯為獨行俠(前稱小牛)上陣對雷霆後,首個喺季後賽登場嘅中國球員,相信球迷已經好安慰。

米切爾紮住上 爵士挫雷霆

同日,爵士作客以102比95擊敗雷霆,星級新秀米切爾喺Game1受傷後,昨堅持上陣取得28分、6個籃板同2次助攻,包括喺完場前關鍵時刻博到犯規同拋投得手,成功主宰比賽,加上列比奧有22分、7個籃板同9次助攻,個人3分8投5中,協助爵士燃起晉級希望。另邊廂,韋斯布克有19分、9個籃板同13次助攻,保羅佐治取得18分、10個籃板同1次助攻,安東尼有17分同9個籃板,但由於史堤芬阿當斯完場前6犯離場,導致雷霆無法翻身。

周五賽程

7:00am 熱火 Vs 76人

9:00am 塘鵝 Vs 拓荒者

9:30am 馬刺 Vs 勇士

周六賽程

7:00am 溜馬 Vs 騎士

8:00am 巫師 Vs 速龍

9:30am 公鹿 Vs 塞爾特人

昨日賽果

騎士 100:97 溜馬(1:1)

雷霆 95:102 爵士(1:1)

火箭 102:82 木狼(2:0)

前者主場、季後賽7場4勝制,()內為總場數;資料僅供參考