醒你神龍拆彈秘技

單刀

「最主要睇佢推波嘅距離，個波貼腳嘅話，衝出去會畀人扭過你，如果離腳嘅話，就可以衝出去撲個波。當然，亦好睇當時情況或對方係邊類型球員，有時會做大字形畀人射，但如果對方有能力扭波，就盡量唔好跌低，Delay佢直至有後衞返嚟幫手，甚至令佢焗住射出界。」

12碼

「多數盃賽之前，我哋都會有準備資料，臨場會有指示畀守門員，加上門將以往經驗同嗰刻嘅感覺，睇吓對方身體狀況，點樣擺動身體等等去綜合，都可以估到對方會射邊一邊。如果遇到一啲決定性嘅情況，仲可以玩心理戰，企埋龍門一邊畀人射大位，或者幫佢擺波講一啲說話，施加壓力喺對方身上，都會有幫助。」

接高空波

「依家嘅守門員要喺呢方面提高好多，現今接高空波撞擊性大咗，不過訓練時儀器多啲，例如有假人或欖球用撞擊訓練道具，真實性多啲，利用多啲儀器啦，可以增強守門員去接波嘅信心。」