奇利湯臣發揮佛系力量 勇士Game2再拔刺
勇士喺NBA季後賽西岸首圈Game2主場以116比101再贏馬刺，場數領先2比0，奇利湯臣再次發揮最近當旺嘅「佛系力量」，個人全場攻入31分，包括第4節獨取16分，協助勇士連續6場季後賽擊倒馬刺，可以話晉級在望。
史堤芬居里因傷繼續做觀眾，不過杜蘭特有32分、6個籃板及6次助攻，奇利湯臣交出31分同5次助攻，協助勇士繼續贏波，當中「湯神」三分球8投5中，佢唔止喺第4節攻入16分，仲試過喺第2節「掟板」諗住親自補中，雖然佢跳得唔夠高失敗咗，但證明佢信心返晒嚟。
馬刺方面，艾迪列治攻入34分、12個籃板及3次助攻，成功向批評者反擊，可惜隊友唔生性，導致馬刺遭遇作客10連敗，同時連同上季喺西岸決賽被橫掃，佢哋已經連續6場季後賽輸畀勇士，或者球迷唔使再爭論，到底馬刺另一球星李安納應唔應該冒險復出嘞！
韋迪季後賽得分超越「大鳥」
同日，熱火喺東岸首圈Game2作客以113比103擊敗76人，36歲嘅韋迪翻生，後備上陣攻入全場最高嘅28分，兼且有7個籃板、3次助攻同2次搶截，累積3,910分超越「大鳥」布特，進佔季後賽歷史最高得分第10位，協助熱火場數追平1比1。