AD發威塘鵝玩謝「3哥」拓荒者
NBA季後賽首圈Game1爆出小冷門，第6種子嘅塘鵝作客「西岸3哥」拓荒者，憑安東尼戴維斯（AD）交出「雙雙」及朗度的17次助攻，以97比95險勝，這也是今季季後賽首個賽日中，唯一由排名較低者贏波嘅賽果。
由於古辛斯重傷收咧，賽前塘鵝難免被睇低半線，幸好陣中另一球星安東尼戴維斯就成功撐起全隊，今仗收穫35分、14個籃板、1次助攻同4次封阻，而控衞朗度亦交出6分及17次助攻，協助塘鵝喺全場撳住砌，即使拓荒者列拿特取得18分、7個籃板同7次助攻，呢支西岸第3種子一樣要俯首稱臣。
湯臣「歸位」 勇士拔「刺」
至於「西岸2哥」勇士主場對馬刺，在史堤芬居里缺陣下，好拍檔奇利湯臣即時「歸位」，全場13投11中，包括三分波6投5中，以高達85%嘅命中率豪取27分，加上杜蘭特亦有24分進帳，終以113比92拔「刺」。東岸方面賽果亦相當正路，排名較高嘅速龍同76人，分別喺主場贏巫師同熱火，先下一城。