蔡再懃技術升呢南華衝銀牌
「得分王」蔡再懃籃球路上遇貴人，令他短短幾年內進步不少，啟蒙老師譚偉洋場內嚴格，場外是朋友，二人一起進步兼成長。高級組銀牌今晚7時假修頓室內場開鑼，頭場南青對遊協，尾場南華將迎戰標準福建，作出衞冕第一擊，阿懃由籃總盃開始逐漸在南華站穩陣腳，他期望今季自己在防守上可以擔任重要角色，協助球隊衞冕銀牌兼聯賽！
由轉校拔萃男書院開始，蔡再懃就開始遇到籃球路上多個恩師，男拔的劉Sir、胡Sir，在他轉校最失意的時候，由谷底拉他一把。其後升上大專又有譚偉洋教授「人生道理」，每一個階段都有貴人扶持，令阿懃短短幾年內進步神速，在南華亦獲教練團器重，表現穩步上揚兼逐漸取得主將位置。今年踏入大專第4年，阿懃特別感激阿洋對他的教導：「呢3年阿洋啟發咗我好多，無論做人做事都好，我都有好大得着。最有印象係佢同我講，喺香港你剷籃未必有人可以擋到，但咁樣其實唔夠，最好加強左手同外投能力，呢番說話令我呢幾年提升得好快。」阿懃效力南青時曾經登上甲一得分王寶座，但近兩年看到阿懃的進步，不再只是得分，整體技術更加全面，拼勁一流更是球迷公認。
亦師亦友共同進步
當年在南華結束球員生涯、亦曾經擔任「紅軍」隊長，加上作為香港理工大學教練的譚偉洋，與蔡再懃開始建立起亦師亦友的好關係，阿懃更認為，譚偉洋就是他的啟蒙老師：「阿洋畀咗好多南華上嘅經驗我，傳波角度，時間等等，喺Poly U佢都畀咗我好多機會出外見識，兩次出戰亞大，1次參加世大，對大家都係一個學習機會。」作為球員和教練都一起見識，一起成長， 良好關係一點一滴累積，成為今天共同進步的蔡再懃和譚偉洋。
今晚修頓夜戰標準福建
挾籃總盃寶座征戰銀牌，繼續有主將羅意庭、朱亮、梁兆華等孭飛的南華，今晚尾場與標準福建交鋒，福建今季陣容變動甚大，除了林羽、謝再生、劉凱濤及盧冠喬留隊外，另有林志洛及司徒偉傑回巢，並加入韋利士（Wallace Willis），力求通過比賽重建球隊，今晚期望能發揮出水準，全力一併。