張國明：我團火未熄！

張國明曾效力R&F富力，他認為內地的嚴格訓練令自己成長不少：「內地嘅健身強度強好多，而且大家都好專注訓練，不時6點幾起身咩都未做就跑步，下晝再練波，同香港好唔同！」「明仔」表示，今年的身體狀況、經驗、場上信心都比之前幾年好：「嗰時差啲冇球隊落班，都要感激『莫生』（莫耀強）同『菲臘』（李輝立）畀機會我。」

標準流浪目前仍處港超聯賽榜榜尾，「明仔」坦言心裏不好受：「季初踢友賽，我覺得呢隊波冇可能喺依家呢個位置。其實今季好多場都係輸少少，可能係經驗問題啦，但球員實力其實唔差。我團火未熄o架，未到最後一刻都唔會放棄！」

「明仔」（右）睇好劉智樂（左）前途無限。	張國明（右）對日援佐佐木周讚唔停口。	徐宏傑（白衫）北上加盟中甲梅州客家。

徐宏傑超班 BB技術好

事實上，今年省港盃和賀歲盃表現搶鏡的卓耀國和劉智樂，都是標準流浪一員，潛質優厚。「『傑仔』（徐宏傑）我一早同佢講，以佢嘅實力唔使喺香港踢波，估唔到咁快就有機會外流……另外，睇好『BB』（黎洛賢）同『樂仔』（劉智樂），『BB』技術好好，『樂仔』就信心大咗好多，希望佢Keep住。」「明仔」說。

新援佐佐木周有拚勁

「季初有佢就好喇！」談到標準流浪最近簽入的27歲日援佐佐木周，「明仔」即讚唔停：「前場串連非常出色，活動範圍又大！無論拚勁、射術、畀波方面都好好，係好全面嘅球員，而且好勤力，呢樣係我哋成隊都要學習嘅地方。」踢過澳洲次級聯賽及菲律賓聯賽的佐佐木周能操流利英語，他表示希望用入波鼓勵隊友，激發他們的鬥心：「『明仔』係一個好醒嘅球員，其實流浪好多年輕球員可能暫時未夠經驗，但佢哋都好勤力想進步。流浪畀機會我喺香港踢波，我會為呢隊波付出更多。」

「明仔」知多啲

出生日期：1990年12月23日

年齡：27歲

身高：1米73

位置：後衞

球衣號碼：14

圖/文：余樂詩