作客佛山Full Power出擊 香港東方使出真功夫

全軍同行為雙線備戰

香港東方大軍昨晨乘旅遊車前往佛山南海，於下午約2時抵達下榻酒店。與以往作客賽事有所不同，東方今次是全員出動，6日的「佛山之旅」將積極狂操，部分未有機會於ABL上陣的球員，安排與當地球隊進行友賽，務求將狀態再一步提升，為月尾本地銀牌賽開鑼做好準備。

球隊副總監香振強透露，經過體能教練及軍醫的調整後，球員目前狀態大好，未有傷兵問題。回顧香港東方上月主場迎戰忠信功夫，比賽早段被對手一度拉開至19比16，最終有驚無險以88比76勝出這場「榜首大戰」，香振強表示：「今場東方一定要集中精神，開賽頭1分鐘已經專注做好防守，再諗打反擊。希望推快速度，畀功夫大前鋒侯活（Justin Howard）多啲壓力。對方係一支強隊，但唔可以認定對方比自己強，否則未打已經輸咗。」

射手特加危險人物

功夫與東方同樣有4位外援，其中內線的侯活及射手特加（Anthony Tucker）表現相當搶鏡。「對手優點係內外兼備，特別係特加擅長射三分，上場對新加坡騰飛之獅，佢嘅三分球5射5中，一定要好小心！今場控制籃板係關鍵，要好似上場咁進取先可以贏波，我哋嘅目標當然係兩場對功夫都贏晒。」隊長李琪說。

常規賽排名頭兩位的球隊將直入季後賽4強，目前東方以12勝2負高踞榜首，不過李琪表示，「一哥」位絕不穩陣，球隊餘下每場都很重要：「東方仲有6場比賽，所以變數依然好大。例如忠信功夫輸畀新加坡騰飛之獅之後，排名出現下降。另外，菲律賓火焰及曼谷吸血鬼都表現唔錯，同樣有機會入頭兩名，所以我哋絕對唔可以鬆懈。」