冇得落場掀「還我耀富」風暴 黃耀富：仲有人想睇我！

球員生涯贏過銀牌錦標，輝煌過，又試過心灰轉行做珠寶、運輸、海鮮等十幾個行業，亦試過每月自費買港會會籍踢乙組……唯一無變係「富仔」每次落場都係最搏命一人，到36歲都無變過：「我就係唔鍾意輸！你好波過我、想扭我，即使踢跌你都唔可以畀你過！我好想用『身教』話畀新一輩知呢份鬥心，就算練波亦要吓吓飛到盡先叫認真！尤其近幾年做埋香港5人足球代表隊教練，身份唔同咗，就更加想做多啲嘢！」

借「複雜」經歷告誡後輩

黃耀富外形畀人覺得佢「品流複雜」，「Fu Dragon」自有一番見解：「我好想告誡年輕球員，如果你一旦掂上『複雜嘢』，就返唔到轉頭！以前我都試過『複雜』，就係咁先知可以好大鑊，但你依家同班細嘅講係無用，尤其球員呢行好容易掂到『複雜嘢』，惟有不停咁灌輸佢哋『踢好啲波自然有錢，有錢你退休後想玩乜都得』！等佢哋退休時就會成熟，亦唔會誤入歧途！」不過「富仔」強調自己「複雜」已經係以前嘅事，依家生活只有教波、踢波同拍嘢，就係咁「簡單」！

希望新一輩「輸在起跑線」

「富仔」同時亦希望新一輩球員「輸在起跑線」：「依家嘅後生仔所有嘢都太易得到，港青甚至港隊話踢就踢，但條路太順，遇到失敗就承受唔到！我自己身世坎坷，反而磨練到唔服輸嘅性格，造就好似『小強』咁嘅生命力！」

夢想FC重用年輕球員，「富仔」講笑話部分隊友「好命嘅做到佢老竇」，亦正正係咁令佢出場時間驟減：「我梗係想踢，冇得踢當然唔開心！但換轉我係細榮（夢想FC教練梁志榮），我都會畀多啲機會年輕球員！我能夠做嘅就係默默咁練波，做好準備等出場，有時候我喺場邊聽到球迷叫『還我耀富』，雖然唔知係真心定假意，起碼仲有人想睇我……倒轉講如果冇人記得我嘅時候，就必須離開！」

圖、文：司徒子文