世錦賽攞牌似返到倫奧 李慧詩：感覺好Refresh！
日前為香港單車隊奪得今屆場地單車世錦賽唯一一面獎牌後，李慧詩（Sarah）昨日返港，吸引大批傳媒接機，Sarah心情亦大靚，表示復出後再在世界賽事奪牌，感覺「Refresh」，並有回到2012年首次參加倫敦奧運時的感覺。
「其實冇諗過自己可以喺世錦賽拎牌，係一個喜出望外嘅結果。因為去完亞錦賽之後就係世錦賽，體力唔太足夠，但去到最後一個競輪賽，咁啱抽到好籤，加上大家都望住禾姬，自己反而有空間去發揮，競輪係好講戰術嘅比賽，我覺得自己喺今次比賽比其他人戰術掌握得好。」雖然帶病上場，但 Sarah仍然摘銀，為港隊取得一面獎牌之餘，亦等於向外界宣布，李慧詩已經全面復出。
「真係好想踩奧運」
贏得世錦賽獎牌，Sarah感覺自己已經回復到以前的水平，但同時看到對手能力提高不少，港隊水平仍然不夠：「我們不可以再拖慢腳步，我們的目標爭取奧運團體賽資格，至少要有兩個運動員參加短途的爭先和競輪賽，但目標依然離我們比較遠，因此要加緊努力。」
於世錦賽重新感受到在鑊場「奔馳」的感覺，Sarah心態上有不少改變：「今次畀到自己一個好大嘅回憶，搵番之前一直冇嘅感覺，由2012年奧運、全運，點樣去拎金牌嘅心態，同嗰種好堅定嘅信心，自己真係好想去奧運！」