輕取夢想FC東方龍獅衝刺前3

昨日中銀人壽香港超級聯賽尾場好戲,東方龍獅作客青衣運動場對夢想FC,東方憑麥基上半場頭槌破網,加上般盧及洛迪古斯於下半場先後建功,以3比0輕取夢想FC,東方兩連勝後續排聯賽榜第4位,主教練「和哥」李健和賽後讚球員肯回防是勝利關鍵,並希望能趁氣勢追上前3!

主場出擊的夢想FC初段主導形勢,11分鐘左翼廖培楓頭槌攻門,被葉鴻輝拍出。東方龍獅18分鐘策動反擊,左閘黃梓浩助攻傳中,麥基力壓羅梓駿衝頂破網,為東方領先1比0。其後兩軍於中場拉鋸,半場東方龍獅以1比0領先。

洛迪古斯復出「埋齋」

下半場夢想FC繼續控球在腳,57分鐘先有黎厚希遠射無功,3分鐘後再有拿祖接應頭槌攻門,其後廖培楓的轉身抽射,均未能為球隊扳平,連番受壓的東方龍獅69分鐘獲12碼,由般盧操刀得手拉開至2比0。72分鐘傷愈復出的洛迪古斯後備登場,落場僅1分鐘便接應罰球頂入,最終東方龍獅以3比0輕取夢想FC,取得聯賽寶貴3分,暫以5分落後「3哥」和富大埔。

賽後東方龍獅主教練「和哥」表示:「之前我哋失波多都係因為唔願意防守,今場佢哋失咗波之後肯走多步協防,絕對抵讚!」對於今季聯賽目標,「和哥」坦言:「希望可以逼近第3,我哋追上嚟,亦都要期望人哋失分,先要做好自己,向住呢個目標進發。」

文:陳焌鏗

攝:司徒子文