騎士失威火箭升空!
兩位占士命運大不同！「大帝」勒邦占士交出「3雙」，但騎士主場以117比126慘敗畀金塊；反觀火箭「大鬍子」占士夏登領軍向塞爾特人復仇，主場以123比120險勝對手，15連勝保住全聯盟首位，認真有冠軍相。
火箭上一次同塞爾特人交鋒，喺一度領先26分嘅情況下最終倒輸1分收場，呢個教訓火箭上下一直記住，尋日喺主場再遇仇家唔敢鬆懈並積極搶攻，夏登全場轟26分、10次助攻、7籃板，另加5個搶截；阿利沙及基斯保羅分獲21分及15分，不過最搶鏡都係艾歷哥頓，攻入全隊最高嘅29分，表現突出。火箭險勝之餘獲15連勝，刷新球隊今季連勝紀錄，亦追平咗球隊歷史第2長的連勝紀錄。
大帝「3雙」難逃敗局
另一位「占士」就冇咁好彩，騎士主場鬥金塊，儘管「大帝」勒邦占士落場43分鐘貢獻「3雙」25分、15助攻及10個籃板球，但未能阻止騎士輸117比126，遭逢兩連敗，至於金塊兩連勝後保住西岸第8位，嚟緊仲要為季後賽努力。