Sarah較早前出戰爭先賽同500米計時賽，都同獎牌無緣，爭先賽喺季軍戰不敵德國選手格寶殊（Grabosch）獲得第4名，之後尋日出擊500米計時賽，曾經喺2013年摘金嘅Sarah更未能踩入決賽。
最後一圈成功突圍
經歷連番失利後，「牛下女車神」迅速收拾心情，喺女子競輪賽強勢殺入決賽！Sarah初賽第3組登場，以小組首名晉級，之後喺第2輪賽事最後一圈發力，以第3名資格殺入決賽，到尋晚決賽面對禾姬及立陶宛古柏卡迪等好手，Sarah排第6出賽，喺最後一圈成功突圍，力壓古柏卡迪獲得亞軍，為港隊喺今屆賽事贏得首面獎牌。男子方面，港隊梁峻榮出戰全能賽，24名選手中以第23名完成賽事。