扭扭昌救駕陽光元朗險勝標準流浪
「扭扭昌」絕殺搶救命3分！昨午另一場港超聯屬護級大戰，由陽光元朗於主場元朗大球場出擊鬥標準流浪。元朗全場撳住攻，更有雲迪奴域先開紀錄，但於84分鐘被標準流浪扳平，滿以為各得1分之時，後備上陣的元朗黎耀昌於完場前絕殺，助元朗贏2比1，取得寶貴3分。
曾昭達讚黎耀昌係福星
今仗陽光元朗大部分時間主導球賽，上半場僅11分鐘前鋒祖連奴就近射得手，惟越位在先食詐胡，之後「王牌」艾華頓的攻門又未有斬獲，兩隊結果半場互交白卷。易邊後元朗攻勢稍為放緩，即被流浪反撲，58分鐘先有劉智樂窄位勁射被陳嘉豪接實，61分鐘再有中堅莫斯奧頭槌頂高。戰至70分鐘，攻足全場的元朗終憑雲迪奴域接應角球頂入，領先1比0，但到84分鐘，卻被流浪莫斯奧以頭槌還以顏色，追成1比1，眼看和氣收場，幸好元朗後備上陣的黎耀昌化身「救世主」，臨完場前近門射入絕殺球，帶領元朗贏2比1全取3分。
賽後元朗主教練曾昭達表示：「球隊護級壓力細啲，好多機會把握唔到，好彩有福星阿昌射入關鍵一球。」而入球功臣「扭扭昌」稱：「自己狀態都未係好好，暫列後備我覺得係好適合。」