張志勇遲到好過無到！

18歲，法國超新星基利安麥巴比已名震全球，但在同一年紀，「阿勇」卻才加入大埔青年軍，接受正規足球訓練。起步比人遲，他以一句「永不放棄、不屈不撓」傍身：「未到最後一刻都唔會放棄，試過見同一份工到第10次先獲聘，唔成功唔代表你注定失敗。當時會早啲到球場練基本功，練完咗仲會加操。」 有幸出戰亞協盃賽事，令「阿勇」感到天外有天，決心要在足球路上「有嘢攞返走」，求變下轉開母會，輾轉獲機會加盟南華。

負評化動力抗低潮

這個當時認為是人生中最好的機會，卻為「阿勇」帶來低潮，當時穿起76號球衣的他被網民以「粗口諧音」取笑，亦被己隊球迷批評得體無完膚：「南華會係老牌勁旅，一定多人關注，一場波幾秒踢得唔好已經負評無數。最難聽嘅批評係行緊入更衣室，畀自己主場球迷叫我返屋企瞓、返上觀眾席坐、轉行、唔好累隊波等等，感覺好難受，信心盡失到波都踢唔到。」

做隊長捧盃	主場開紀錄	放大圖片

那時候的「阿勇」因未懂應對壓力而影響發揮，不過回頭再看，他仍慶幸有過這段經歷：「上咗好寶貴一課，諗嘢唔同咗，將負評轉為動力嘅一種，起碼有人留意你先講你，依家透過唔同平台學識將壓力化解，或者係今季有好大進步嘅原因。」

2016年球季轉投香港飛馬，「阿勇」有如重獲新生，今季表現更見進步，連續第5屆入選省港盃名單外，更擔起隊長一職︰「好期待亦有啲怯，事關過去4屆都有犯錯導致輸波，唔想重蹈覆轍，賽前諗到失眠。」或者只是「諗多咗」，「阿勇」結果在首回合中為港隊先開紀錄，全場球迷高呼自己名字，這一刻他已等了28年：「踢港隊喺主場入波係第一次，條片喺唔同媒體不斷重播，我睇咗差唔多100次。自己係土生土長香港人，28年後喺香港大球場入呢球波，感覺畢生難忘。」

省港盃士哥畢生難忘

最後港隊在次回合劣勢下以12碼戰勝廣東，高舉省港盃的同時，「阿勇」如釋重負，將心中烏氣盡吐：「捱咗咁多年，球迷對我失望咗咁多年，終於可以有代表作。有人可能十幾歲已經成名，我成日話自己黑仔，但黑仔唔會黑一世，遲到好過無到，終於畀我等到喇！我唔知之後條路會係點，但呢兩場係我現時足球生涯最光輝一頁，真係講成世。」

圖／文：袁志浩

勇檔案

年齡：28

身高：1米87

體重：75kg　

位置：中堅

現效力球會：香港飛馬

曾效力球會：和富大埔、

日之泉JC晨曦、天行元朗、南華