德國桌球大師賽周一王者誕生，前世界冠軍、「黃金左手」威廉斯勁到冇朋友，以9比1大炒杜治捧盃，亦係佢繼去年6紅球世界賽、北愛爾蘭公開賽後，今季贏得的第3個冠軍，兼個人歷來第20個排名賽冠軍。值得一提，過去能夠贏得超過20個排名賽錦標，就只得亨特利（36個）、奧蘇里雲（31個）、希堅斯（29個）同戴維斯（28個）4人，威廉斯都算非常犀利。
42歲的威廉斯，奪冠同時擸走8萬鎊（約89萬港元）獎金，其世界排名亦攀上第7位。展望將來，「黃金左手」話自己狀態不俗，有信心喺今年世界賽去挑戰佢的第3個世界冠軍。