剖白犯禁真相李溢晉：我係好龍門
改過自新，能令人變得更強。冠忠南區守門員李溢晉（Edward）去季因未能通過藥檢而停賽，這位22歲門將剖白事件真相，不甘一世背起「藥檢肥佬」的標籤，把握只此一次的機會重新開始，9個月內積極狂操，由冇班落到復出首場即當選直播賽事MOM，誓要用表現做年輕人最佳榜樣！
上月冠忠南區作客傑志，一場如常的港超聯賽事，卻對曾因未能通過藥檢被罰停賽的南區門將李溢晉意義重大。苦等9個月機會終再降臨，22歲的他表示今次「唔衰得」：「呢場波唔可以有任何失誤，唔係就會畀人話呢個人都無用嘅，又藥檢肥佬又踢唔到波，加上隊友都同我講呢場係翻身戰，成個星期腦海都幻想比賽情況，唔想再衰畀人睇。」
賽前過澳門飲嘢累事
故事由去季對南華一仗說起，Edward賽後藥檢不及格，初時被罰停賽兩年，成為香港足球史上首宗禁藥事件，震撼球壇。「當時好愕然，我差唔多每日練完波就返屋企，諗番最有機會就係比賽前同朋友過澳門睇演唱會，為咗應酬朋友嘅老闆，飲咗杯不明飲品。之後都覺得唔舒服，曾經考慮休息唔做後備，但始終對手係南華，都想幫到隊波。賽後藥檢我好快搞掂，當時唔覺得有咩特別，冇諗過最後肥佬。」Edward回想道。
在香港這個現實型社會，停賽兩年經濟確實難以負擔，Edward曾有放棄足球的念頭，堅持只因不甘心：「當時只係啱啱踢起，身邊好多人支持我，覺得我有潛質，唔想辜負佢哋期望，亦唔想就咁退出，好多嘢係捱番嚟，如果一下子冇晒好唔值得。期間聽過冷言冷語，只好當係動力，你愈睇死我，我就愈要表現畀你睇，要掩住你把口，令你改觀。」
力證「唔要我係你損失」
後來因上訴成功獲減刑至9個月，加上停賽期正值休季，Edward坦言重拾希望。不過早已揹起「藥檢」標籤，要覓得球會落班亦非易事，他惟有一直狂操保持身形，終皇天不負有心人：「就算只聽到有機會落班，都增添唔少動力，一直保持正面態度，同自己講唔可以低過之前嘅水平。最後去返南區好開心，想表現到畀其他人睇，你唔要我係你嘅損失。雖然知道重拾狀態好難，幸好自己感覺仲喺度。」最終Edward復出首戰屢救險球，助球隊守住和局，更當選該仗Man Of The Match，證明自己有力與同輩袁皓俊及陳嘉豪等睇齊，未來力爭港隊席位：「希望做個全面嘅守門員，成為好龍門一分子，港隊冇理由只係得幾個人揀，有邊個唔想做第一。」
「停賽喪操檢討態度」
改過自新，能令人變得更強，亦令Edward更認真看待球員身份：「球員要識得分輕重，以前我態度有問題，覺得唔使踢就唔關我事，如果當初有依家嘅態度，可能已經飛黃騰達。每個人都有機會犯錯，我依家仲有一線生機重新開始，係好幸運嘅事，所以我會更加珍惜，做年輕人榜樣，有機會改過就一定要好好把握。」
認識李溢晉
花名：阿咀
出生日期：1995年12月8日
身高：1米8
體重：71公斤
位置：守門員
曾效力球會：東方龍獅、夢想駿其
現效力球會：冠忠南區
球衣號碼：17
．本周賽程．
中銀人壽香港超級聯賽
2月3日(六)
理文 Vs 傑志
將軍澳運動場
下午2時30分
$80、$30(特惠票)
夢想FC Vs R&F富力
青衣運動場
下午5時30分
$60、$20(特惠票)
中銀人壽香港超級聯賽
2月4日(日)
和富大埔 Vs 冠忠南區
大埔運動場
下午2時30分
$80、$30(特惠票)
標準流浪 Vs 香港飛馬
深水埗運動場
下午2時30分
$80、$30(特惠票)
東方龍獅 Vs 陽光元朗
旺角大球場
下午5時30分
$80、$30(特惠票)
圖/文：袁志浩