2018NBA明星賽組隊宣布完成，由於今屆賽事改制，東岸隊長勒邦占士同西岸隊長史堤芬居里有權自己揀隊友，甚至可以選對岸球星幫手，結果大帝揀咗西岸嘅杜蘭特、安東尼戴維斯同古辛斯，東岸球星淨係揀咗同佢反晒面嘅艾榮！至於「咖喱仔」史堤芬居里就搞笑話最緊要揀到「字母哥」安迪杜甘普做隊友，唔使再一次畀呢位希臘球星於背後撞低「補樽」！
話過要組強隊嘅勒邦占士，今次嘅選擇可以話證明咗近年西岸整體實力強過東岸，據講佢嘅首選更加係杜蘭特，同時佢亦搵埋前拍檔艾榮組隊；眾所周知艾榮因為對「大帝」不滿，因此今季先至從騎士轉會到塞爾特人，依家又要再次合作，唔知屆時兩位正選球星，又會擦出邊一種火花呢？
另一方面，之前揚言唔排除搵晒全後衞組「最矮明星隊」嘅史堤芬居里，就搵咗「大鬍子」占士夏登、迪羅辛、艾賓特做正選隊友，但最重要都係搵到「字母哥」安迪杜甘普入伍拍住上，點解咁緊要？
日前「咖喱仔」就解釋過原因：「上年明星賽就係佢將我爆開，再表演補樽！揀到安迪杜甘普做隊友，就能確保呢件事情唔會再發生喺我身上！」。史堤芬居里仲「嬲嬲豬」咁話，被爆開一刻嘅圖片喺網上瘋傳，仲話見到張相成為海報添！不過「咖喱仔」好波又玩得，今屆明星賽美國時間2月18日於洛杉磯舉行，屆時會唔會重演呢個經典一幕呢？