朱兆基尋寶達人
在科技發達的年代，網絡上只要輕輕一「淘」就能買到心頭好，肯花心機親身尋寶的人買少見少。香港飛馬新任助教朱兆基卻堅持「尋寶」初心，享受「捐窿捐罅」，開設潮流古着店「美華氏」，尋找極具價值的經典復刻衣着；兼任港隊青年軍助教的他，為本地足壇發掘更多寶藏，利用經驗將年輕球員打磨成耀眼寶石，場內場外都是「尋寶達人」！
「細個已經鍾意行街買衫，好早接觸呢行。經歷過球市不景氣，覺得踢波冇保障，有喺澳門開舖嘅經驗，當時老友搵我夾份，自己想趁後生試吓，為退役鋪路。」球壇「型佬」朱兆基3年前成為香港知名古着店「美華氏」的合夥人，店內倉務、布置、銷售及物流全部「一腳踢」。不過由「波牛」變成「潮人」，「朱基」都有被考起：「真係一張白紙咁，惟有跟員工慢慢學。依家有兩間舖，人事上好複雜，員工請假、情緒等，各有各溝通方式，最困難係點樣管伙記，以前踢波邊會有呢啲煩惱。」
足壇伯樂尋找有潛質小將
古着店於天后及旺角設有分店，選址亦大有學問：「做古着有個Concept，想畀大家一種尋寶嘅感覺，所以就算喺旺角，都揀個偏少少嘅地方，客人捐窿捐罅再搵到寶，感覺更開心！」「朱基」指開舖令他重拾青春回憶：「以前會同朋友去天后買牛仔褲，一定要搵到嗰條洗水紋，身水身汗逐幢褲去搵，搵到條好啱心水又平嘅，堅係開心。」
1年前開始成為港隊青年軍助教，去年尾更加入擁有不少本地年輕球員的香港飛馬教練團，「朱基」同樣抱「尋寶」心態，希望為港隊及球會發掘更多寶藏：「做教練同開古着舖幾似，只係一個搵舊嘢，一個就搵新嘢。教年輕球員會見到好多有潛質嘅小將，再喺入面搵未來着得起港隊波衫嘅，就係『寶』。」
望創造自家品牌衝出香港
除售賣美國貨外，店內亦有自製及改良的古着，「朱基」目標創造自家品牌，嘗試衝出香港：「我同拍檔好想建立一個本土品牌，畀人知香港都有自己嘅古着，再逐步進軍外國！」「朱基」對土生華將同樣有情意結，出任飛馬助教，希望利用經驗助小將成長：「首要目標係幫飛馬挑戰聯賽冠軍，幫年輕球員成季保持爭勝心，我會同佢哋講，只要你完全付出，實有你發揮嘅時候，永遠要問自己係咪做到最好！」
本周賽程
中銀人壽香港超級聯賽
1月18日（四）
東方龍獅 Vs 傑志
旺角大球場 晚上8時
$80、$30（特惠票）
1月20日（六）
R&F富力 Vs 陽光元朗
廣州燕子崗體育場 下午2時30分
$50
香港飛馬 Vs 冠忠南區
香港大球場 下午5時30分
$80、$30（特惠票）
1月21日（日）
和富大埔 Vs 夢想ＦＣ
大埔運動場 下午2時30分
$80、$30（特惠票）
理文 Vs 標準流浪
將軍澳運動場 下午5時30分
$80、$30（特惠票）
圖/文：袁志浩